我嘅工作就係揀我鍾意嘅女仔拍拖: 矛盾

「我呀爸呀媽話離婚..」Kylie話。
「下..？」我望住個海望得太耐，佢又冇講嘢搞到我聽唔清。
「我呀爸呀媽想離婚..」佢再講。
「下！！咁大鑊，點解嘅..？」我問。
「其實佢地嘅關係一直都唔係咁好，成日都嘈..。細細個嗰陣我試過見過我呀爸打呀媽，嗰陣我就一直覺得呀爸唔係好人。然後由嗰陣時開始我就對我呀爸越嚟越冷淡…，一嚟係嬲佢打呀媽，二嚟我自己都好驚會比佢打」佢話。
「嗯..」我唔諗住打斷佢講嘢。
「其實由嗰時開始我就估到佢地終有一日會離婚…，只不過我冇諗過當佢地真係講離婚嘅時候，我會咁唔開心…」
「哦..」我繼續聽。
「啱啱呀爸好嬲，整爛晒啲嘢…，我同呀妹係房都好驚…，唔敢出去。然後過咗一陣呀媽入房同我講佢地會離婚，我當時個腦一片空白..，之後就打咗比你」佢話。
「細個嘅時候佢地曾經有應承我講話唔會離婚..」佢再講。


「可能覺得你大個..，知道你會明白？」我話。
「我明呀..但真係發生嘅時候又唔係好接受到」
「我明呀...」我話。
「不過我都知嘅…，如果佢地兩個純粹係因為啲仔女而一齊，咁都只係出於責任」佢話。
「係嫁，如果佢地都唔鍾意對方，夾硬係埋一齊都好辛苦嘅」
「嗯…。有時候愛情真係好恐怖…」佢話。
「嗯..」我答佢嘅時候好心虛，因為我理論上係呃緊佢感情，而事實上我都要跟住規矩去做嘢。

我望住佢嘅側面，仲隱約係塊面度見到有少少淚痕。可能係出於我唔忍心見到佢咁唔開心，我慢慢舉起隻手，然後輕輕放落佢背脊度。佢都乖乖地咁比我放隻手係度，我慢慢咁掃佢背脊去安慰佢，我知道呢啲時候佢好需要一個人係身邊。佢係一個偏向柔弱嘅女仔，好善良，但好多時都將自己放到好後。對住佢會有種想保護妹妹嘅感覺，好不知不覺間就會好想保護佢。
「乖，冇事啦」我邊掃邊講。我唔知究竟係咩驅使我咁做，因為我知道如果我地擺太多感情係對方身上，最後受傷嘅會係大家。呢個情景我已經試過好多次，由一開始純粹因為好奇或者外表吸引而接近佢地。去到發現自己已經不知不覺間沉咗船，而最後當然都係分手收場。其實好多人都同我一樣，將愛情嘅循環不停咁重複，直到有一日你發覺自己已經麻目唒。體貼嘅、溫柔嘅、大波嘅、長腿嘅、性感嘅、可愛嘅……。回想起每一任前度，其實佢地都有佢地嘅特別之處，但去到最後好多時都只係放大唒大家嘅缺點，然後分手。只不過對我嚟講，呢份係我嘅工作，我有必要不停咁經歷所以起承轉合，然後繼續物色另一位前度。當然，我有我嘅理由。而當我隻手搭落Kylie背脊嘅時候，我已經見到我地「愛情」嘅墓碑。


「嗯..」佢好似好咗少少，我繼續掃佢背脊。

咁嘅情景又維持咗一陣，然後Kylie將佢個頭挨咗落我度。神奇嘅係，我竟然有種心跳加速嘅感覺。雖然唔係好誇張嘅感覺，但至少feel到有。我解釋唔到點解佢會比到呢種我好耐冇感受過嘅感覺我，就算連同Rainbow 相處都唔會有。
「…」我一方面唔忍心推開佢，另一方面又有啲享受而家嘅感覺。但係我知道當我地一齊咗之後，倒計時就會開始。
「我….我舒服咗好多啦..」佢望住個海講。
「嗯，咁就好啦」我話。
「嗯..，咁..我差唔多要返上去啦..」佢坐返直個人，然後話。
「好，洗唔洗我送你？」我企咗起身。
「唔洗啦..，我自己行得啦」
「好啦咁，小心啲啦」


「嗯..！知道」佢話，
「咁我走啦」
「好…，byebye」佢話。
「Byebye」我同佢行相反方向。
「呀文…！！」我行咗兩步佢就叫我。
「嗯..？」我擰轉身。
「多謝你」佢細細聲講。
「傻啦，小事啦」
「下次..我請你食飯啦」佢話。
「唔洗啦～快啲返去啦，好夜啦」
「好啦..！下次見」
「嗯！下次見」我話。

我記得我啱啱做呢行嗰陣時好容易就心軟，頭幾次分手嘅時候都好唔忍心講。就算有時分完都會好內疚，因為我都曾經試過沉船，但取捨完之後都係決定繼續做。所以我有少少擔心自己…，驚我又再沉船，但最後又要分手。我返到屋企咗沖個熱水涼，不斷係度諗今次應該點處理。我冇諗過做咗咁耐都仲會對客心動，而最神奇嘅係連我自己都唔知點解，就係好想保護佢..。我唔想傷害佢，但我又唔想辭職住…。我好矛盾..，呢一刻，我個腦入面有兩個女人..



人只得一個 情趣太多
而手得一對 最愛太多
如未有飲歌 試唱著半首情歌
當試驗拍一半拖 怕甚麼