我嘅工作就係揀我鍾意嘅女仔拍拖: 回憶

沖完涼之後我返咗房，播咗歌，然後行咗去書枱坐低。我拎起咗放係書枱櫃桶嘅盒，然後慢慢打開。盒入面有一張又一張唔同嘅相，相入面嘅男主角全部都係我。而女主角…，就有好多個。我一直有個習慣，每次拍拖我都會留一張ex嘅相。唔係因為仲鍾意，亦都唔係因為唔忍心，純粹係我想記得佢地。我會揀一張我覺得最有紀念價值嘅相，然後曬出嚟，放入呢個盒度。咁我每次睇到嘅時候，都記得我曾經同佢地有過咁多美好嘅回憶。呢個習慣係我返咗呢份工之後都一直保留住。

我拎起一張張相，望清楚每一個同我拍過拖嘅女仔，一段段唔同嘅回憶不斷浮現出嚟。我將啲相跟時序去排列，然後將我返呢份工之後識嘅女仔抽唒出嚟。我拎起最前嗰張相，相入面我同個女仔係譚仔三哥入面影，我地一人一碗米線，佢拎起部手機同我自拍。佢就係我返咗呢份工之後第一個客，Christy。

Christy比我嘅印象好深刻，除咗因為佢係我第一個客之外，佢嘅性格都好特別。張相係係我地第一日拍拖食晚飯嘅時候影，我揀咗呢一張相係因為呢張相好代表到佢。我同佢嘅故事由當時speed dating開始…，記得嗰陣我用報復嘅心態入行，而佢好成功咁勾起咗我嘅好奇心，然後我慢慢接近佢。佢比我嘅感覺好文青feel，全身嘅打扮都好文青，而樣亦都係偏向清純嘅樣，但絕對係標準嘅靚女嚟。而我最有印象就係我一坐低，佢第一句講嘅嘢竟然係..
「你鍾意食譚仔定係三哥？」佢問我。
「下？？？….」我聽到呆咗，完全唔係我想像嘅文青性格..。
「你冇食過譚仔？」
「喔..，唔係。我有食過..」我呆下呆下咁答，覺得佢好奇怪。
「咁你鍾意邊個多啲？」佢再問我。


「errrrr…我鍾意三哥多啲..」我焗住答。
「咁就好啦！我都係！」佢笑得好甜。
「喔…，好…」我都唔知點覆佢。
「我叫Christy～」佢伸咗隻手出嚟。
「呀文」我同佢握咗下手。
「我咁問係因為如果我地真係拍拖呢，我怕你會鍾意食譚仔多過三哥」佢話。
「下..？？？」我又呆咗，冇諗過佢有呢啲咁古靈精怪嘅思想。
「咁到時你話要食譚仔，我就死都要食三哥，真係分分鐘會分手」佢話。
「咁…如果我真係鍾意譚仔多啲，都可以就你嘅..。不過好彩我鍾意三哥多啲..！」我完全唔知發生緊咩事，成個對話完全係跟住佢嘅flow走，我控制唔到。
「啱啱我問其他仔，竟然勁多都話鍾意譚仔多啲，之後我已經冇心聽佢地講嘢..」佢話，睇嚟佢真係三哥fans…。


「咁嚴重…？」
「緊係啦！有時候夾唔夾就好睇呢啲細節嫁啦」佢話。
「…都….係….？」
「咁你呢？你有冇咩問題想問我」
「都係要類似嘅問題..？」我問。
「咩都可以問嘅，不過唔好問啲太悶。咩做緊咩呀，屋企有冇細佬妹呢啲聽厭唒」佢話。
「咁呀….唔…..。你覺得睇戲嘅時候，左邊嘅扶手係你嘅定係右邊嘅扶手先係你嘅呢？」我問。
「哈哈哈～幾得意」佢話，然後開始認真諗。

我嘅第一次對客嘅經歷就係咁樣開始咗，之後好快我地都一齊埋。佢話因為我同佢啱傾，又唔會嫌佢諗嘢好特別，所以就主動同我表白。我冇諗過我第一個客就會有啲咁特別嘅經歷，而我同佢一齊純粹係因為佢靚同埋我覺得佢幾有趣。當然，亦都係工作需要。



我地第一日拍拖嘅晚飯就係食三哥，我好記得嗰陣我問佢點解揀三哥..
「我有兩個原因嫁喎，你想聽a定b先？」佢撓住我隻手話。
「就b先啦」我話。
「b係因為我鍾意～」
「….，咁a呢」我好無奈咁笑一笑。
「a係因為，我想第一日拍拖深刻啲」
「食三哥好深刻咩？」我問。
「咁你以後食三哥都會記得我，唔深刻咩？」佢笑一笑。
「哈哈，深刻呀」我話。就係咁，我地就係呢度影咗第一張相，亦都係我覺得最有紀念價值嘅相..。而佢亦都成功令我以後每次食三哥，都會諗起佢。

我將佢張相揭去後面，相後面寫住佢嘅中文名同我地第一日拍拖嘅日期。我有另一個習慣就係會鍾意知道佢地嘅中文全名，因為我成日都覺得叫中文全名好親切。望住咁多張合照，我心入面硬係唔係好想見到我同Kylie嘅相會出現係度…。唔得，我會諗一個兩全其美嘅辦法。

愛你的那一個 傷你的那一個
誰才是你愛情中的伯樂


放棄了這一個 然後等待著下一個
最後哪一個 讓你最捨不得