我嘅工作就係揀我鍾意嘅女仔拍拖: 傾電話

返呢份工有個好處就係我唔會長期有人睇住我做嘢，但都要不時匯報下自己呢個禮拜做過啲咩比上面聽。去咗幾多場dating，同每個女仔嘅狀況係點等等全部都要report。每拎到一個電話都要開一個file，但可以由自己決定去追邊個女仔，當然都要mark返低。當初我都好好奇，究竟公司係點樣知道搵媒返嚟對佢地生意有冇幫助。因為佢好難去知道每個媒嘅作用，好難去quantify每個員工嘅表現。當然，我地要遵守好多規矩，唔可以太自由咁去做。例如要包裝到自己好完美，唔可以食煙等等。我做咗好一排，先發現原來一個speed dating場嘅口碑真係好重要。每個入場嘅人收嘅費用都唔平，而個場多唔多人嚟就真係好睇熟客嘅口碑。慢慢做落就知道，原來「啲仔啲女高質」係因為我地表現得好，同埋佢請返嚟嘅人外表同社交能力都唔會差。有時候公司都會有啲特別要求，例如唔可以只係揀同一個年齡層嘅女人拍拖，間唔中都要揀啲年熟少少嘅試下落手。

我打開電腦，打開咗個file，入面全部都係唔同客人嘅profile。我由A至Z開始搵，H..I,J,K….Kylie。我打開咗個file，望住佢當初報名嘅相，同埋一啲基本嘅個人資料。下面有個跟手人，寫咗我個名。我繼續睇關於佢嘅嘢，希望可以從中了解佢多啲。睇睇下無啦啦Kylie就打咗比我..

「喂？」我話。
「喂..？」
「做咩啦..？」我問。
「可唔可以陪我傾一陣..」佢好柔弱咁問。
「可以呀，緊係可以啦。你冇事呀嘛..？」
「冇事阿…純粹係我瞓唔著..，想搵傾下計」


「嗯…，你聽日唔洗返工咩？」我問。
「我頭先請咗假..，想休息下先」
「哦～都係嘅，你休息下好啲..」
「係喎..！我會唔會阻住你瞓嫁？」佢問。
「唔會呀，都唔係好夜姐。我平時都冇咁早瞓..哈哈」
「咁就好啦..」佢講完我地靜咗幾秒。
「唔知講咩添…哈哈..」佢尷尬咁笑咗下。
「哈哈，你笑返咪幾好」
「..！啱啱好樣衰囉..比你見到我咁..，但又好想有人聽我講嘢..」
「傻啦，每個人都有佢地嘅情緒。同埋唔樣衰呀～幾cute呀哈哈」我話。


「唔好笑我啦..！」佢怕怕醜醜咁話。
「哈哈，不過都多謝你會搵我講」
「我多謝你肯嚟就真..，無啦啦打比你..都有啲唔好意思。不過其實我冇咩朋友…，我又唔知搵邊個好，所以就打咗比你..」佢話。
「唔洗唔好意思呀，我本身都冇嘢做。不過遲啲..如果你唔開心都可以打比我呀..」我講咗個大話，因為嗰陣我同Rainbow 一齊食緊飯。
「嗯..，好呀..」佢細細聲講。講完大家又靜咗。
「你介唔介意我播啲歌呀？」我問。
「唔介意呀..！我都想聽下歌」
「你想聽邊個歌手？」
「都可以呀～我咩都聽下」佢話。
「咁我是但係我個playlist 度播啦，我有個list全部都係啲慢啲嘅情歌，好啱夜晚聽」


「嗯！好」佢話。然後我將電腦駁咗喇叭，較細聲少少就開咗個playlist隨便播。一播，係James Arthur嘅 Say you won’t let go。一段柔情嘅吉他前奏，係夜晚播真係好舒服。
「英文歌你ok？」我問。
「ok呀..！呢首幾好聽～」佢話。
「你聽過？」我有少少驚訝。
「冇呀..嘻嘻..不過幾好聽」
「哈哈你鍾意就好。歡迎點歌～」我話。
「唔洗啦，聽你嘅就好」
「我有時瞓唔著就會係呢個playlist播少少歌，然後較一個鐘就熄咗隻app，咁就唔洗自己起身熄」
「下，可以嫁咩？點整嫁..！」佢問。
「我下次教你呀～」
「嗯！好呀」佢話。然後電腦入面傳嚟林家謙嘅聲音。
「林家謙！！！」Kylie好興奮。
「哈哈，我都記得你好鍾意林家謙」
「係超鍾意～！」
「除非我有預知的超～能力」我忍唔住唱。


「能趁疫症不猖獗時的春天～」佢跟住一齊唱。
「哈哈，你唱得幾好聽喎」我話。
「多謝～你都唱得好好聽呀！」佢話。我突然間諗起幾年前係中環碼頭…，Cherine話我唱得好聽。
「多謝..」我同Kylie傾電話嘅時候竟然諗起Cherine..。
「其實我不必～異能大到可扭曲真相 改～春秋～」Kylie繼續唱，而我冇跟住佢唱，只係好專心咁聽歌詞。
「做咩唔唱嘅？～喂？呀文？瞓咗啦？」Kylie繼續講，而我好專心咁又回憶緊同Cherine係中環碼頭嗰日…

其實我不必異能大到可扭曲真相改春秋
我只想忘掉你不解這溫柔斷言未接受