『Miss Tang,你好呀,我又黎寫周記la,雖然我唔想寫,因為其實呢樣都係功課黎。
其實呢個禮拜都無乜野特別,最特別就係妳幫我地調左位,而家同左女神一齊坐,雖然Queenie佢係靚女一個,但係我都唔係太想同佢坐架咋。
女神呢,通常都係高高在上,好難溝通,聽人講佢都幾高鬥架,而且呢,聽返黎佢係學校出面係有仔既,唔知Miss妳知唔知呢,不過就算無仔佢都唔會吼我架啦,所以坐喺隔離都唔知有乜用。
我諗妳都係嫌我成日同隔離位傾計先搵個女仔同我坐,嗯,我係明既,睇怕以後都無乜機會出聲,放心啦,我都會讀下書既,就黎要簡科,我想讀理科呀,因為我好憎背野,希望妳幫下我la,我都知自己成績麻麻。
就黎聖誕節la,希望今年我都會有禮物la。
應該夠哂字數,咁我收工la,bye bye Miss。』
Q:「咔嘰…咔嚓…噗哧…」
我小息打完波一返埋位,覺得有啲唔對路,隔籬位嘅Queenie攞住本週記笑到咔咔聲,我一望!
我:「喂!妳黐線㗎!」
我一手搶返自己本週記返嚟,但我諗已經太遲,篇嘢重要係提起佢,真係勁尷尬囉;佢扮到個樣無乜嘢,但又帶住少少不屑,呢啲咁嘅女仔真係除咗靚之外就無乜用,令人好唔開胃。


我打返開本週記簿一睇,點知…
Queenie用紅筆畫到我篇週記花晒,圈晒啲錯字出嚟,例如『簡』變返做『揀』,『周』變做『週』,『野』加咗個口,『左』變做『右』,吓?乜撚呀?乜叫同右女神一齊坐?!
但唔關事…問題唔係咁。
我:「妳做乜撚嘢呀!?睇都唔夠?重要畫到!?」
Q:「見太多錯字,忍唔住,Miss唔改等我幫下妳。」佢個樣重要好似日行一善咁,如果佢係男仔我已經開咗拖,其實我好想升巴佢,但班入面好多低B仔冧佢,我唔想死住。
我:「妳係咪有病未食藥呀?!」
因為我堅嬲,都幾大聲下,隔籬位都望住我哋。
Q:「喂,雖然我唔吼你啫,你都唔使吼返我呀?」
我:「妳噏乜撚嘢呀?我鬼得閒睺妳呀,自以為是嘅八婆。」
Q:「我係話你怒吼我呀,男仔之家咁唔玩得,真係小氣到爆,懶得理你。」


我:「最好啦!我以後都唔會睬妳呀!」
結果我今日除咗lunch time同friend食飯之外,上堂一句嘢都無再講過,我後面同隔走廊左面都係兩個唔鍾意出聲嘅女仔,前面係一個毒腐宅四眼龜,可以話四面楚歌。
已有 0 人追稿