我怎可能是女神👸🏻獵人🏹（第一季更新至斷更為止）: 貳

都唔記得自我介紹返，我叫做Xavier，唔好以為我個名有幾特別，其實只不過係我老爹鍾意X-man就亂Q咁幫我改，好彩佢唔係鍾意Ironman或者Batman，如果唔係叫Iron或者Bat就真係俾人笑足一世，佢重要衰到寫埋喺出世紙度，就算我想自己改都唔係話改就改。
我今年中三，唔鍾意讀書，剩係鍾意玩同溝女…咁介紹又好似唔多妥，都會讀下書嘅，因為某啲原因我喺屋企無王管，所以都幾曳下，但又因為另外一啲原因，我唔係太壞，我無入黑社會，無走私煙，小學到上年都有偷下嘢，小至同學枝筆，中至便利店嘢食，大至街邊撬單車…都係咁啦，因為有個friend上年第二次斷正俾人拉咗，佢已經十六歲，結果無開警司警戒留咗案底，所以我都驚，今年我就金盤洗手慳返啲精力，重有我都會打下架嘅，通常見血就會收手，當然我希望對方都係咁…
我屋企唔係有錢，只係住公屋，十幾年無搬過，由細到大都喺屋邨入面流連，所以識得唔少差唔多年紀嘅細路，乖嘅又有，曳嘅又有…咪好似嗰個偷嘢失手嘅friend咁；得閒會求祈上人屋企打機，蒲下社區中心打乒乓波康樂棋，喺街場打下籃球踢下足球，不過其實我無嘢叻，好在阿媽生得我高大，又唔算樣衰，出嚟玩好少有人蝦我，喺球場上唔打得都睇得同撞得，我又唔使幾點幾點要返屋企，所以多人鍾意同我玩，自自然然都識到女仔。
屌！我唔想打千字文自介㗎，係因為Queenie佢今日真係全日無理過我，搞到我好似自閉咁；雖然我同佢唔friend，但調咗位之後都有謦下無聊嘢，講下先生壞話咁。
但，今日我真係悶死咗，直到放學。
我：「妳打算以後都唔睬我呀？」
Q：「係你話唔睬我，我而家成全你，重想點？」
我：「咁妳係衰吖嘛，睇人週記。」
Q：「唔係我特別想睇喎，係班長佢派錯位，我一打開就見到自己個名，點知有人講我壞話。」
我：「咁妳都無理由畫花我本嘢。」




Q：「唉…你啲中文，笑死人，我真係忍唔住。」
Queenie除咗外表係女神，讀書都唔太差，尤其係中文，經常考頭一二，同我呢個喺尾幾徘徊嘅文盲實屬兩個世界嘅生物。
我：「重要笑我，道歉呀！」
Q：「咁細路仔㗎…想我呢個女神同你呢個街童道歉，好難喇！」
我：「無話錯妳囉，真係好高鬥。」
Q：「吹呀？係你叫我做女神咋，我都無講過。」
呢個女仔，好可惡，唔打得佢，又唔夠佢講…
Q：「算喇，怕咗你，嬲爆爆咁，畀返我本你睇當打和無數，有錯字就幫我改啦。」
真係好無恥，明知我中文屎，佢寫錯我都未必知。
Q：「點呀？唔要呀？我收返㗎喇。」




我一手搶走佢手上本週記。