我怎可能是女神👸🏻獵人🏹（第一季更新至斷更為止）: 伍

好唔容易捱到小息，去搵啲親信吹下水先。
我：「阿健，放學有無興趣去㧻下康樂棋呀？」
點鬼知佢理都唔理下我，同阿康喺櫃桶入面唔知搞緊乜，我一䚎，妖，原來佢兩個偷偷地喺度玩電話，睇緊傳說對決新角色嘅介紹。
呢兩隻嘢算係我比較friend嘅同班同學，好好彩坐埋咗喺一齊，可以由朝返學吹水到放學。
我：「頂你，兩隻嘢喺度打機？點呀，隻新角好唔好用呀？要出乜裝呀？」
我塞個頭去佢兩個中間，點知…
健：「喂！唔好扮friend啦，平時唔嚟搵我哋，女神請假就蒲頭，食屎啦你！」
康：「以後唔撚同你打三排呀，雙排就算。」
我：「喂…唔關我事喎，係唔知點解佢坐我隔籬…」
健：「總之我哋唔抵得啦！躝呀！」




佢哋講到咁…我都唯有只好…正一死毒撚，想要女咪自己去溝囉，關我乜事喎，女神又唔係我嘅；不過呢，呢幾日同佢謦欬又真幾過癮，可能大家背景唔同啦，都會覺得對方啲嘢幾有趣。
返埋自己位，都係唔多安定，見前面個宅男又喺櫃桶玩緊電話，於是我忍唔住哄埋去。
我：「喂，細龜玩緊乜呀？」佢個樣好似某藝人。
龜：「欸…乃木坂養成…」
佢個樣支支吾吾，好似好羞於啟齒咁…
我：「玩乜春㗎？」
龜：「抽女idol卡…然後聽歌…打下拍子…答下問題…」頂，真係毒到…講出嚟都醜到搵窿瓹。
我：「咦…幾靚女喎。」唔想打擊佢，附和下…
龜：「係呀？你都覺呀！佢叫遠藤桜呀！紅得好快呀佢，我覺得佢係全世界最靚嘅女人，我諗佢可以好快紅過飛鳥㗎喇，好好彩呀我！用咗五百蚊就抽到佢張SSR！」完全唔知佢講緊乜…
我：「恭喜你…咁平就可以抱得美人歸。」




龜：「呀，唔講住，我要答問題先。」
真係救命，喺呢個打機如賭錢嘅年代，迷idol真係重蠢過做兵…做兵都話有幾%機會可以約到餐飯，日本idol呢家嘢，就算去到日本現場睇concert，都係睇米粒㗎咋，人哋個場咁大，唔好話我話。
不過宅男通常都幾nice，見人講人話，見宅講宅話，佢哋就會好興高采烈咁分享，不過聽佢一輪嘴講idol，同俾右女神教訓我中文有得fight。
我…有啲掛住右邊嘅女神…