我怎可能是女神👸🏻獵人🏹（第一季更新至斷更為止）: 肆

亂咁嚟都上日榜第七，係讀者教我點寫文㗎～

自從週記事件之後，我同Queenie嘅關係好似好咗，雖然佢貴為女神級，但我又唔覺佢好離地，應該內心都係曳曳哋，如果唔係又點會有男朋友吖，佢一直都無否認我咪當佢係囉；不過有無都好，學校入面都係有好多傻仔冧佢，樣衰嘅又有，毒腐宅嘅又有。
無論係做兵定追女神，我都覺得呢樣嘢係戇鳩嘅，除非你真係對佢一片痴心，非她不可，願意無條件付出奉獻，如果唔係你一定有更好嘅選擇；你計下數都知，一個屋邨妹可能同佢喺街市拮串魚蛋燒賣，M記請佢食個新地筒都已經冧你，再唔得可能一個開心樂園餐都搞得掂，最緊要嗰期隻玩具啱佢心水。
好似Queenie呢啲，我諗最低消費都要花園餐廳整個扒餐先有少少效用，同佢活動坐底都要睇套戲，溜下冰…我唔係話呢啲消費高到上天，但本身個人就唔夾，冰我都唔識溜，咪盞出醜…我寧願落社區中心示範如何四Q內清晒對面啲棋，起碼有啲傻妹會拍手掌讚我叻。
好多人會心諗，咁都係追一個女仔啫，唔係越靚越好咩？搞笑，追女包生仔咩…好多時得個追字㗎咋，條女就過癮呀，你就得荷包乾溏嗰份，當你唔知泵到幾多自以為成功嘅時候，我都已經同個屋邨妹打得火熱啦，係咪？點解要同人爭啫，又唔係要過世，為咗食返餐啫，使唔使不計成本呀，食好嘢要畀錢㗎，唔係免費。
同埋呢，呢啲女神硬係唔知點解唔知喺邊就會彈個男朋友出嚟，Queenie就係好例子，咁你投資就會化為烏有，好似倒錢落海變成一殼眼淚。
嗱，我唔係啲乜A0傻仔喺度發開口夢㗎，嚴格嚟講我都拍過四次拖㗎；第一次係六年班同隔籬位女仔，越玩越friend咪好似玩家家酒咁一齊囉，但嗰陣太細個就乜都無發生，到畢業就大家算囉；第二次係中一玩online game識到個同區嘅女仔，咪喺隻game入面做情侶囉，真係老公老婆咁嗌對方㗎，後來我哋出嚟見過兩次，攬攬惜惜過唔知係唔啱feel定佢搵到第二個，佢無端端消失咗。
好兒戲？細路係咁㗎啦！起碼我無為女神傾家蕩產，而又全身都摸過晒吖。
咦？點解我咁得閒自言自語嘅？




係喎，今日右女神佢請咗假…