「唂咕,唂咕,唂咕…」
係喎,其實我都唔使較鬧鐘,Queenie係一個勤力返學嘅乖乖女,點都會準時起身㗎啦,等佢叫我咪得囉;而我一起身,已經聽到女神喺浴室入面沖緊涼,一諗起佢白滑吹彈可破嘅肌膚,玲瓏有致浮凸嘅身段…
就知我要爭取時間擦牙先。
我:「QQ,可唔可以遞枝牙擦牙膏畀我?」
Q:「嗯嗯…等等!」
搞乜鬼呀,成十秒都未得嘅。
Q:「嗱,畀你,早晨呀!」
今次唔止係得隻手,道門打開嘅角度大咗,我見到佢含住枝牙擦嘅樣同我打招呼,重有佢嘅膊頭,而佢亦都幫我喺牙擦上面唧咗牙膏。
我:「欸…早晨呀,唔使咁多牙膏…三份二得喇。」
雖然牙膏唔貴十零蚊一大枝,我都唔想嘥。


而我就當然去咗廚房擦牙啦。
擦完牙趁佢重未沖完涼,我就順便換埋校褲,你知啦,浴室地下濕晒,換褲同玩雜耍無乜分別,況且我平時自己一個當然喺廳換衫。
過咗一陣Queenie出返嚟,已經換埋校裙,不過個頭就重係濕,同埋條裙上面有啲水點,無辦法啦…入面又屈騭,又無浴巾。
佢出返嚟就到我洗頭,我除咗上身衫,著住校褲,所以都懶得閂門喇。
Q:「係咪得呢個風筒,無溫度較嘅?」
我:「平時我唔用㗎…遲啲幫妳搵過個啦…」
Q:「重有啲燶味咁嘅…」
我:「唔好咁近吹呀!」
入面都唔知積咗幾多塵,我堅係驚著火呀…原來,同女仔住真係唔係講玩,諗就好開心,實質有好多嘢要煩,而且無大人喺度所有嘢都要我處理。
Q:「我出門口先喇,費事俾人撞到,陣間見啦。」


所謂嘅拖住手一齊返學,是不存在的。
我:「早晨,Queenie…」
Q:「嗯,返到嚟嗱。」
我:「好唔慣,又見到妳。」
Q:「好快就慣㗎喇。」
以為一齊住咗之後有乜分別,原來又無。
小息果陣我又圍埋去男仔堆度研究傳說對決,其實都幾無聊㗎,通常笑下邊個跌排,買咗skin就要攞出嚟曬命,不過我諗我以後都唔使買。
而我個位就俾Yvonne坐咗,我未同過佢班,唔熟嘅,佢係以前Queenie嘅同班同學,都係女神級。
臨完小息我返去自己位,不過重有人,我就去八下細龜點同虛擬偶像謦欬。
Y:「妳好返未呀?今日一唔一齊食晏?」


Q:「欸…我重有啲喉嚨痛…」
我一聽就知Queenie佢想避飯局慳錢,痛乜鬼吖!
我喺Yvoone背脊後面望住Queenie點頭。
Q:「好啦,一齊食啦!」
已有 0 人追稿