我怎可能是女神👸🏻獵人🏹（第一季更新至斷更為止）: XIX

小息完結鐘聲響起，喧鬧的課室又變返平靜。
Q：「真係…OK吖嘛？」
我：「妳哋都係食普通嘢嘅啫，四五十蚊到？」
斷估女神就唔會迫大排檔食三十幾蚊學生餐，如果去一般似樣少少嘅茶餐廳或者特色餐廳食個set lunch，估計都係呢個數左右。
Q：「差唔多咁啦，我銀包都重有啲錢嘅。」
我：「妳既然要瞞，又點可以唔同朋友食飯呢。」
我就話可以餐餐返屋企煮餐肉腸仔蛋公仔麪，但我無可能迫女神同我一樣，呢個問題我都係唔知點解決好，遲早我都要畀錢佢使，銀行嗰七八千蚊真係唔知可以捱到幾耐，但話過要幫，我都要諗計…
至於我嘅晏晝就推咗佢哋唔食大排檔，自己去街市買燒臘飯盒順便做今晚嘅餸。
晏晝學生買飯有優惠㗎，廿五蚊一盒，我愛咗一盒叉燒飯同一盒油雞飯，兩盒都要多飯…
返到上屋企，我潷咗大半盒飯落隻碟，食咗嗰幾條易變壞嘅菜芯，加幾嚿油雞叉燒已經好飽；咁樣，我今晚就有白飯同埋叉油雞做餸。




老闆好好人切咗隻雞髀畀我，我就當然留返隻柄畀女神啦，食完我就放晒啲嘢入雪櫃。
返到學校上埋嗰三堂就放學，女神去舅父度攞埋啲家當過嚟；我唔知佢點同舅父解釋嘞，不過既然人哋都唔係太歡迎佢嘅話，睇到佢自己走人應該樂意之至先係，我就去街市配多抽鎖匙畀佢，如果唔係佢喺度我都唔知點出街，佢返嚟我又要喺度等佢。
雖然我無王管，但我都好驚俾老竇鬧，無端端招呼個女同學嚟屋企住，唔知佢想鬧邊方面嘞，總之我都係唔會同佢講。
返到屋企，過咗一陣女神都嚟到，拖住一大個桃紅色嘅喼，一打開，全部都係衫褲鞋襪，當然重有好多Bra同埋底底。
我：「呢度清咗半個櫃桶出嚟畀妳用，應該…都放唔晒，妳自己諗下點安排啦。」
然後我又上返床繼續打機。
Q：「做乜走咗去呀？怕醜？使唔使呀…你睇下呢條底底靚唔靚？」
佢叫到咪望下…白色…花邊透紗設計…pat pat位同肚仔位都係透嘅…
我：「靚…當然靚…」
Q：「使唔使面紅呀？你呢個衰十一嘅低B仔，你重要同我洗底褲㗎，交叉仔！」




！！！