我怎可能是女神👸🏻獵人🏹（第一季更新至斷更為止）: Twenty Seventh

擦牙洗頭洗面，今鋪輪到我要匿喺廁所入面換校褲，佢講得無錯，成地成牆都係水真係好易整濕，尤其係我隻褲腳更加首當其衝。
我真係唔好意思就咁著住條底褲出去換校服，唔係話細佬有反應驚畀佢睇到，畢竟頭先都搭咗個帳蓬仔，而且琴晚又俾佢撞破好事；而係我覺得咁樣好唔美觀，佢就話有靚靚內衣褲可以當泳裝行cat walk，我條底褲又殘又霉又穿窿，都係費事，見到太大對比自己都心傷，搵日去買啲新先。
出返嚟Queenie當然已經換好晒衫吹緊頭。
我喺度諗，即係我朝朝都可以睇佢沖完涼著住底衫褲個樣，夜晚又可以欣賞佢真空上陣，唔通我係全世界最幸福嘅男學生？
係鬼！得個睇字，盞傷心！重要日日諗買啲乜煮嚟喂佢食，真係頭都大，邊有心情昅嘢。
今日係聖誕聯歡，都嚟到第三年，例牌都係玩嗰啲嘢，爭凳仔，大風吹，估領袖，收買佬，世界之最，七起身，真係講得多都厭。
唔好以為有非洲話事啤或者國王遊戲呢啲變態嘢玩，係只限大專Ocamp專屬，喺中學校園是不存在的。
最開心咪食嘢囉，有到會食，Queenie終於有返餐好嘅落肚，呢餐加埋班會費咁就一百㗎喇，不過好彩係一早已經交咗，如果唔係又肉痛。
食完嘢就到交換禮物環節，我同Queenie當然趁亂塞咗自己份禮物出去，俾人認得就唔係幾好啦。
然後一個一個抽學號出去攞禮物。




每年呢個環節，我諗其實大家都唔係諗住會換到啲乜好嘢，五十蚊買到乜吖，反而係睇下大家會有啲乜嘢送得啖笑都好。
Q：「哈，俾你講中，真係有人送『鐘』」
我：「都幾靚吖，有隻…黃色雀仔喺上面。」
Q：「人哋有名㗎，叫woodstock呀，係snoopy個friend嚟。」
我都知佢係snoopy個friend，但我鬼知啲配角叫乜名喎，問我傳說對決啲英雄或者無双啲角色名我就知啫。
其實今時今日送鬧鐘真係玩嘢，全世界嘅人都用手提電話鬧鐘㗎啦，我極度懷疑啲鬧鐘廠係專登繼續整啲鬧鐘出嚟畀人買嚟交換聖誕禮物。
咁都幾靚嘅，鮮黃色一個鐘仔。