我怎可能是女神👸🏻獵人🏹（第一季更新至斷更為止）: Twenty Eighth

我：「呀，我抽到一枝筆。」
Q：「靚喎，係四色筆嚟。」
我：「係喎，重有鉛芯筆嘅添。」
唔好睇少一枝筆，呢枝pilot筆日本製造好似要成六十幾蚊，我算係抽到好籤。
Q：「咁好彩㗎你，如果知送畀你係我就買排中華牌鉛筆算。」
我：「唔知邊個鍾意買sanrio聖誕卡通街派呢？」
Q：「又唔係派畀你！」
然之後就觀察下其他人收到乜，食物當然唔少，例如朱古力，曲奇窩夫禮盒；當然，大家發現到有五香肉丁三罐裝即時圍埋起哄啦，其實送乜唔緊要，歡樂先係最珍貴嘅。
計我話收五香肉丁好過收朱古力多多聲啦。
收到嘅係一個女仔，佢當然O晒嘴。




唔好以為佢係最不幸嗰個，因為有個收到相框嘅男仔已經趴咗喺枱面，睇嚟佢不願面對命運多舛嘅人生；又唔使唔灰嘅，等我幫你影返張黑白相，錶喺個相框入面，再安放上架模型車度，咁成件事咪好實用囉，係咪？
Q：「都唔錯吖，起碼係水仙花牌。」
右女神對食嘅執著真係唔講得笑。
「都係嘅，但係慘在我好怕食辣嘢呢…」
Q：「有無興趣交換吖，我個鬧鐘都無乜用。」
「都好喎，woodstock都幾得意。」
女神…妳真係好嘢呀下，服咗妳。
然後佢換完禮物帶住奸笑咁抱住五香肉丁返埋位，即係我屋企庫存而家有七罐『水仙花』牌五香肉丁，睇嚟夠食到新年，哈哈…
然之後我又去睇下啲兄弟收到乜。
康：「唉，超市禮券，又係益阿媽…」




健：「做乜喎，最實際係你呢份啦，想買乜都得，我隻雪人玻璃波都唔知有乜用。」
有乜用？望住搖兩搖扮落雪囉。
康：「係啫，但我都好少去超市，如果係錢就好。」鬼唔知錢最好咩，送禮從來都無效益㗎啦。
我：「你唔鍾意不如我四十蚊同你買咗佢吖，橫掂我自己住成日要去買日用品。」
康：「好喎！成交！」
我即刻喺銀包攞咗兩張廿蚊出嚟一手交一手，結果我學咗Queenie，而女神就望住我笑。
最後嘅funtion係壁報板佈置，寫嘢畫嘢點會輪到我嚟做，牛高馬大嘅我當然負責拉同釘嗰啲閃爧爧裝飾條，然後就準備放學。