我怎可能是女神👸🏻獵人🏹（第一季更新至斷更為止）: Nb，Niobium，鈮，鋼材補強，～1USD/g

Q：「做乜呀，你好想攪我呀？」
我：「咪同妳講過，男人見到靚女就想㗎啦。」
Q：「多謝你兜個圈讚我靚喎。」
我：「唔係講笑，日日咁樣對住妳有啲辛苦。」
Q：「如果你夾硬嚟嘅話，我係咪會反抗唔到？」
我：「睇怕就係，雖然妳唔係細粒，但我都幾大力。」
Q：「咁我算唔算好危險？」
我：「都話唔會咯，同埋要出力制服妳嘅話，我嗰度就唔會有心情乜嘢，除非綁住妳啦。」
Q：「唔通你已經喺度策劃緊？」
我：「無呀…我唔係啲咁嘅人嚟。」




Q：「嘻，原來你都幾忍得喎。」
我：「咁我又唔係未試過，都明嘅…做完都唔一定開心，如果個女仔唔開心自己又唔開心。」
Q：「睇嚟你比我想像中有感情喎。」
我：「做乜呀，如果唔係妳當我係乜呀？」
Q：「我以前真係以為你係隨街溝女係女都得嗰啲。」
我：「妳唔好聽佢哋亂噏啦…雖然咁講都錯唔晒嘅，其實我都無乜得揀，有屋邨妹肯黐埋嚟已經好好，好似妳呢啲女神諗都唔敢諗。」
Q：「重女神？落難喇…」
我：「個底係女神吖嘛，我都知妳係無可奈何先就住我過咁嘅生活啫，快啲搵個有錢仔收留妳啦。」
Q：「邊有咁易搵到自己一個人住嘅有錢仔喎，就算有…咪又係為咗屌…」
我：「呢個世界都係咁，但如果住得舒適，食得好，有錢使，都叫公平嘅。」




Q：「我唔想學我阿媽呀。」
我：「妳鍾意啦，我都唔會餓死妳嘅。」
Q：「係呢，你話你EX普通樣，咁你鍾唔鍾意人哋㗎？」
我：「都鍾意嘅，睇邊方面啦…」
Q：「鍾意容易食？」
我：「都係嘅…女嘅嘢，無嗰陣咪講到有幾鍾意囉，但有時對得耐咗就會覺得煩。」
Q：「但到想用嗰陣就搵人哋？」
我：「哎呀，妳唔好咁撩解男人啦…」
Q：「咁佢好唔好食㗎？」
我：「我都無得比較，好難講喎…但男仔想食嗰陣就乜都話好味。」




Q：「咁乜嘢樣開始你哋會覺得想食？」
我：「好似妳咪通街想食妳囉，妳都知㗎，同妳落轉超市都成街男人望住妳。」
Q：「喂呀，唔係講我呀，咁Amy呢？Betty呢？Cherry呢？Debby呢？呢啲你想唔想食？」
我：「我又唔係好熟佢哋，做乜講到人哋好似免費有得食咁喎，我無咁變態。」
Q：「剩係講樣咋嘛。」
我：「樣呢啲都好睇口味嘅，重要睇心情，就算以前我都只係覺得妳靚，以為妳得個靚字好悶。」
Q：「如果Elizabeth呢？」
我：「嘩！呢個真係搞唔掂。」
Q：「唔好咁衰啦，人哋都係肥啲啫。」
我：「都唔係啲啦…分分鐘重我一截，而且唔止肥，啲頭髮又亂，塊面又油又多粒粒，講嘢一嚿嚿奇奇怪怪咁。」
Q：「但係有波喎。」
我：「嗰兩團肉…福字五香肉丁你都唔鍾意啦。」
Q：「哈，原來公屋仔都有啲要求。」
我：「我有讀視藝㗎，有正常審美能力。」
Q：「係咪都係鍾意屋邨妹嘅獨有風情。」




我：「咁又真係幾有風味嘅…同埋夾囉。」
Q：「我而家都係屋邨妹嚟喇。」
我：「妳咪扮…」
「鈴鈴噹噹噹鈴鈴…」
Q：「咪嘈！我條仔打嚟…喂。」
「Queenie妳上咗床未呀？」
Q：「上咗喇，點呀，掛住我呀？」
「Queenie唔好唔開心啦，我今日唔係帶咗好多錢出街咋…我聖誕同屋企去愛沙尼亞睇雪，佢哋話將我啲零用錢撥落去我玩樂費度，所以少咗零用…」
藉口多多，無錢就唔好扮有錢仔啦，唔方唔係攞晒啲錢買Game買衫買波鞋咩，養唔掂女神就過主啦。
Q：「都話無怪你咯，下次你講清楚咪得囉，我又唔係餐餐都要食得好，M記譚仔我都得㗎。」
「妳重話唔係嬲？唔好講反話啦…」
聽咗兩句已經覺得佢條仔好煩，都好似唔識溝女咁嘅…不過人哋有家底呀，吹呀！唔脹噃！
我係乜都無，但偏偏可以同女神一齊住！
我又無咁缺德一直趴喺人哋條女隔籬偷聽人哋講電話嘅，咪返自己床瞓覺囉…女神呢啲，我真係諗都無得諗。
愛沙尼亞喺邊樹嘅呢？Search下先。