我怎可能是女神👸🏻獵人🏹（第一季更新至斷更為止）: Ru，Ruthenium，釕，抗磨蝕膜，～10USD/g

一下唔小心整到Queenie大喊咗出嚟添…我都唔知點解自己會突然之間咁激動，甚至大聲話佢；對我嚟講呢啲又唔係乜新鮮事，賣底衫褲，PTGF，私影，甚至乎CC都有大把妹仆去做，為咗錢，嗰啲嘢其實係好濕碎，你情我願唔覺得有啲問題。
如果係以前，我唔多likey佢，覺得呢啲女神公主病喺溫室養大，睇唔起其他人高鬥黑人憎，講嘢尖酸刻薄讕係嘢；睇到佢而家落難甚至乎淪落到要做埋啲咁嘅嘢我一定會笑佢抵死，甚至乎唱到佢全校都知。
但，而家我同佢嘅關係已經唔同咗，我竟然因為佢做埋啲咁嘅嘢而唔開心…明明佢係家境富裕嘅女神，點可以做埋呢啲屋邨妹先會做嘅嘢。
而且我發自內心擔心佢，明買明賣都算，有幾多妹途中俾人呃，非禮，強姦，偷影擺上網，最後只有一個人啞忍甚至承受網絡公審…
我：「對唔住…唔鬧…唔好喊啦…」
我跪咗上梳化摸摸佢個頭，佢已經喊到成塊面都濕晒，然後毫不客氣攬住我印落我件衫上面。
我：「無嘢…唔使喊，唔會有問題。」
佢伏喺我個肚上面抽泣咗幾分鐘先開始停，睇到我心都痛晒，以後漫漫長路都唔知點算好。
Q：「我對你唔住…欠你實在太多…日日喺度住你嘅…食你嘅…咁樣落去唔得…」
我：「點會唔得喎，話咗要幫妳㗎嘛，而家先過咗幾日，妳未咁快食窮到我住。」




Q：「係我無用…過唔到啲好慘嘅生活。」
我：「邊係呢…都要慢慢習慣㗎，放心啦，實有辦法嘅，我哋一齊解決好唔好？」
Q：「好…多謝你呀。」
我：「妳應承我，唔好再做呢啲嘢，唔好賺呢啲錢，好危險㗎，返唔到轉頭，得唔得？」
Q：「我一蚊都無，你養我呀？」
我：「係。」
我知我喺亂噏講出嚟，但我根本就無第二個答案揀，最緊要盡快氹返佢等佢開心返先。
Q：「你憑乜呀？我好貴㗎…」