我怎可能是女神👸🏻獵人🏹（第一季更新至斷更為止）: Tc，Technetium，鍀，放射性示蹤劑，～100USD/g

溫柔鄉原是英雄塚，呢度實在太香嫩溫潤。
結果我攬住佢張被，半夢半醒咁轉來轉去。
約莫過咗一粒鐘，我驚醒發現咁係唔恰當嘅，如果佢返嚟見到我瞓喺佢張床上面一定會當我係大變態，於是我又過返去自己張床度繼續瞓。
我順便利用睡眠學習法，將塊periodic table放喺側邊，每當我瞓醒開眼就會見到下一粒原素，然之後又可以繼續瞓返，答周公叔叔下一粒原素係乜…
16號，硫，sulphur，黃色非金屬固體，酸，溫，有毒，歸腎、大腸經，解毒殺蟲止癢，補火助陽通便，周公點頭稱是。
然後有種聲音將我從呢個迷離空間拉返去現實，就係Queenie拉閘嘅聲音，原來太陽已經落咗山，而間屋係漆黑一片。
我重記得啱啱睇埋初中課程嘅最後粒元素，鈣。
我打開燈開門問：「Queenie返嚟喇？」
Q：「係呀！好重，幫我攞嘢！」
我：「嘩，搞乜鬼！買咁多嘢嘅？」




佢攞住兩大個AEON膠袋，入面放滿晒食物。
Q：「要食咪要買囉，嚟啦，呢袋要放雪櫃。」
我都唔得閒問佢搞乜鬼，就攞起其中一袋攞入廚房；日本紀文獅子狗，Al Fresco雞肉腸，台灣新竹貢丸，美國安格斯肥牛片，香港四海魚皮餃同芝心丸，重有好幾個印滿日文嘅杯麪；全部…都係靚嘢嚟喎，佢發生乜事？
放完雪櫃就出返去，Queenie喺另一個袋度攞緊啲熟食出嚟，壽司拼盤，芝麻八爪魚，蟹柳沙律，火腿拼盤，上海粗炒，唔講以為自己去咗食自助餐。
Q：「嘻嘻，終於唔使就住就住咁食，嚟啦，開餐喇！」Queenie笑笑口望住我，但個樣好生硬。
我：「妳…係咪…發咗達？」
Q：「傻嘅，如果發咗達我就唔返嚟啦，係咪？」
我：「但妳買咁多嘢…阿媽出咗糧畀妳？」
Q：「無呀…我都想。」
我：「咁妳何來有錢買咁多嘢？定係妳其實重有錢？」




斷估唔係偷我屋企錢掛…呢度加埋我銀包都唔知有無五嚿水喺度。
Q：「無錢呀…你唔好問啦…」
我：「話畀我知啦，我都係擔心妳啫。」
Q：「無呀，賣走咗少少嘢啫。」
我：「吓，有乜可以賣？我見妳都係得啲衫褲鞋襪攞嚟咋喎，首飾？」
Q：「咪就係衫褲鞋襪…」
我：「妳起碼賣走兩三件先買到咁多嘢食喎，唔好賣啦…賣晒搵乜著喎，咪盞又要買過。」
我都知佢好多衣物係靚嘢嚟，但呢啲嘢邊保值喎，放返出去得一兩百，搵自己笨。
Q：「我…賣走咗條底褲咋嘛…」
我：「吓！妳意思…二手…原味…嗰啲？」




我日撚日躝街，點會唔知佢講乜，呢樣嘢大把屋邨妹會做，我甚至識得嗰啲妹。
Queenie無開口答我，但就點咗一下頭。
我：「咪住喎…出面一條都係百零二百…妳點換到咁多嘢返嚟？嗰兩包香腸都成嚿水啦。」
Q：「喺人哋面前除…摸多幾下…咪…」
我：「黐線㗎！妳傻咗呀？！學人賣肉！？」
Q：「做乜鬧我喎！！」
係喎，我做乜鬧佢，其實唔關我事…
Q：「嗚嗚嗚嗚嗚嗚嗚！！」
死火…