我怎可能是女神👸🏻獵人🏹（第一季更新至斷更為止）: ξη’

Q：「即係話…你話阿媽叫你食生果…」
我：「係呀，就係喺信入面同我講。」
Q：「15即係等你今年15歲先拆？」
我：「嗯，重可以有其他意思咩。」
Q：「點解佢可以寫定咁多？」
我：「媽咪係因為病毒感染做成急性肝衰竭，病發嘅時候已經復原唔到，除非有人捐肝先可以唔使死…幾個親人都唔適合…我又太細個…」
Q：「對唔住…」Queenie挨埋嚟搭住我膊頭。
我：「唔緊要，人總有…生老病死。」
Q：「所以佢就喺最後嘅時間準備定？」
我：「嗯，最後嘅兩個月到，我老竇話佢病到暈低都堅持唔入醫院，要陪住我，重帶我周圍去，直至頂到喺屋企累低先call白車入醫院，然後過咗幾日就…但我嗰陣好細個乜都唔知，而且好多嘢都唔記得咗。」




呢個時候QQ喺我後面攬住我，塊面挨落我條頸。
我：「妳做乜又喊埋一份呀？」
Q：「女仔係咁㗎啦！」
本來我自己一個都好啲，但QQ喺度陪我拆信，結果兩個喺度一齊喊。
Q：「雖然你無慶祝生日…但過得好有意義…而我…只係識扭禮物，要食好嘢，要搞生日會麻煩其他人嚟幫我慶祝…我…」
我：「每個人都唔同㗎…無得比較…」
我哋安靜咗兩分鐘左右。
Q：「你重唔拆信？」
我：「無呀，因為一年只可以拆一封，拆完就無，所以會好珍惜，通常會品下神先。」
Q：「總共有幾多封㗎？」




我：「三十封，一共由6號去到35號。」
Q：「去到35歲媽咪就唔理你嗱？」
我：「到我35歲，媽咪在生嘅話都應該六十幾，無理由重要佢理我喇掛？」
Q：「咁又係…我…可唔可以同你一齊睇信？」
我：「無話唔得嘅，又唔係秘密嚟，我諗都係叫我溫多啲書嗰類嘢。」
Q：「咁我哋一齊睇吖。」
右女神佢坐咗喺我右面撓住我隻手，我哋兩個就好似兩兄妹等睇媽咪封信咁。
媽：『衰仔！睇你個樣應該都唔多鍾意讀書㗎喇，係咪俾我講中咗呢？唉，你老竇又應該無乜時間睇住你同教你，點算好呢？唉…』
Q：「嘩！你媽喺你五歲嗰陣就知你唔鍾意讀書，有無咁犀利呀？」
我：「我都唔知，佢係小學教師嚟，可能真係睇得出掛。」




Q：「咁你重咁懶！就考試喇，快啲溫書啦。」
我：「知喇…都要睇埋封信先㗎。」
Q：「你睇下吖，你媽咪手廣東話寫得幾好呀，個咗字都有加口字部㗎，點解唔學下呀？」
我：「學咗啦…咪多得妳。」
媽：『就嚟升中四喇…下年就要開始準備會考，而家要諗定點揀科，你同我醒醒定定，唔好諗住有邊個friend揀乜科，又或者有靚女揀邊科你就走去跟呀，唔好亂嚟，知唔知？』
Q：「原來嗰陣都重係考會考。」
我：「應該差唔多轉㗎喇，媽咪唔係教中學可能無理啫，不過都係要揀科，分別不大。」
Q：「哈，咁我唔應該話你知我會揀乜。」
我：「唓，喺屋企已經要對住妳，唔好以為我好想同妳同班囉。」
Q：「哼，你口硬啦。」