我怎可能是女神👸🏻獵人🏹（第一季更新至斷更為止）: nōnāgintā sex

「撚樣，出嚟買飛呀！」自從有咗Queenie喺自己身邊，變得對呢啲溝通方式好厭惡。
我：「吓，我都要食呀？」
「梗係啦，你坐喺度容乜易攪我條女呀！」
妖，一早攪到厭啦；我當然無講出口啦，至於厭呢樣嘢呢…當時肉體上係的確有少少嘅。咁佢話要食咪食囉，橫掂我都未食晏，只不過我想返屋企自己煮慳返少少錢啫。
「我屌你老母，唔好阻撚住晒得唔撚得！」
一路排隊買飛，佢就一路屌㞗我，好，我忍。
我：「我阿媽死咗㗎喇，你想屌可能要去天國先，另外我無諗住要阻住你。」
「冚家鏟，叫你阿媽帶埋你走啦，正一閪仔。」
輪到佢買嘢食，佢嗌咗兩份鐵板雜扒餐；跟住到我，一碟粟米肉片飯，學生有可樂送。
過咗三四分鐘，我哋就將啲食物捧返埋位。


「細蚊，妳睇下吖，佢呢啲人食得幾寒酸，妳靠佢嘅話乞米都似呀。」佢咬住塊牛扒一路講。
蚊：「我唔係要搵返佢，只係…你以後唔好煩住我得唔得？」
「邊有煩住妳呢，我不知幾惜妳。」
蚊：「你除咗識屌我重識做乜呢？」
「咁我都係惜妳先屌妳啫。」
真係難為佢可以厚面皮到講得出句咁嘅嘢，差唔多可以媲美啲強姦犯話我姦妳都係因為欣賞妳嘅天生麗質。但我又喺度諗，係囉，愛妳所以咪同妳一齊囉，一齊咪扑嘢囉，又好似無乜矛盾，事實上我以前副德性都係差唔多，只不過我態度好過呢隻烏龜王八蛋好多。
咁佢哋兩個一路食飯就一路討論，來來去去都係離唔開嗰三涿屁，重悶過我碟飯呀，所以都無謂分享出嚟浪費大家眼力喇。總之結論就係細蚊已經下定決心要離開呢條粉腸，而條粉腸就繼續喺度死纏難打，我就一粒聲都無出過，只係坐喺度確保細蚊唔會俾人蝦；好彩小弟好得閒，佢兩個一路喺度煲無米粥我就一路喺度㩒電話。
當然食完飯都唔會有結果，屋邨餐廳地方淺窄，呢個唔係好唔好意思嘅問題，就算條友大爺咁款都唔會敢得罪快餐店入面嗰兩個廚房佬，佢哋黑面起上嚟分分鐘比起黑社會重恐怖，起碼入面又刀又滾油…所以我哋出返去萬無目的咁遊蕩。
又唔係萬無目的嘅，粉腸想屌閪，細蚊想分手，我想送完人哋返屋企快啲收工，分工實在清晰明確。
行下行下我哋飄咗入社區中心，都好嘅，呢度有大人條粉腸都唔敢太放肆，我又可以有啲漫畫睇下；我好有口齒㗎，我過嚟唔會阻住佢哋講數，你哋想點咪點囉，總之細蚊無事就得。


所以我就睇住本蠟筆小新嘰嘰笑，我諗條粉腸一定勁想打柒我。