我怎可能是女神👸🏻獵人🏹（第一季更新至斷更為止）: 101

點知我嘅想像同現實都係有啲差距，由於冬天衫厚得滯我只係扯住咗佢嘅衫䄂…唔理喇，死就死啦，我右手沿住佢嘅上臂用盡全力一下劈落佢條頸度，喺佢失平衡之際左手捉佢手腕，右手扣佢手肘一屈，再用右腳踢冧佢右腳，我哋兩個相相倒下…
當然，我跪咗喺佢上面鎖死佢隻右手，佢趴咗喺度已經失去反抗能力，我繼續將佢右手用力拉向條頸度，膝頭哥就跪實佢尾龍骨；咁，我應該都重佢少少嘅。
「呀呀呀呀呀！」我已經無暇去理佢痛苦嘅表情，只係知自己隻上臂濕咗，有啲涼，有啲痺…
我：「細蚊！唔好掂把刀！」
佢想執起把刀我即刻制止佢。
蚊：「但係…好危險…」
我：「上面有佢指紋同我啲血，報警！快啲！」
細蚊佢已經嚇到花容失色，攞住我部電話嘅兩隻手都係咁震，好似連個九字都㩒唔中咁。
「咪！咪住！」
我：「撚樣！持械傷人，你洗定pat pat啦！」


「喂！咪住！大佬…有事慢慢講！」
我：「我講你老母呀！有乜好講？」
「你搞到我有案底，出嚟我實煩死你兩個！呀呀呀呀呀呀呀！」我用盡全力屈佢隻右手。
我：「點煩呀？你知唔知我而家喪劈你條頸係可以殺咗你㗎！又或者鋤爆你尾龍骨…」我單腳跪喺佢條腰度錐個膝頭落去…
「呀呀呀！大佬！唔好…知錯！」
我：「知錯就入去坐啦，冚家鏟！」
「你放過我先！我以後唔再搞你哋！」
我：「我點解要聽你話呀，唔好以為我驚你呀！出嚟咪再慢慢玩囉，仆街仔。」
「你搞到我有案底…我咪又搞返你囉…」
我：「點搞呀？係咪要我而家劈斷你條頸去自首？」


「細蚊未夠稱，我告你衰十一！」
我：「屌，你自己唔係衰十一？」
「一個案底同兩個案底有乜分別呀，哈哈！」
我真係難為佢可以喺咁嘅情況笑得出。
我：「係呀？細蚊都未告我，你三唔識七告我？警察識你條毛呀？定係你係邊個警司個仔呀？」
唔係講笑，如果係都幾大鑊，今時今日…
「喂…細蚊部電話，有你哋啲對話同相…我都睇得幾開…呀呀呀呀呀！」佢左手係咁大力拍地。
我：「細蚊，佢講真㗎？」我擘大隻眼望實細蚊。
蚊：「我…我唔知…」可能我惡得滯搞到佢喊咁口。
「總之你放過我…有你著數…」


諗深一層我又唔係想攪條契弟嘅，只係俾佢拖咗一刀實在好唔忿氣，就算佢坐完…我都唔會有乜得著，係咪告我又好，又或者煩住細蚊又好，冤冤相報都無乜好結果，我又唔係勁到一打十…