我怎可能是女神👸🏻獵人🏹（第一季更新至斷更為止）: 102

我：「係咪放過你…就以後都消失喺我哋面前？」
「呀！呀吖！唔好拉…一定！」
我：「發誓啦，仆街。」
「我發誓，如果你放過我，以後就消失喺你哋面前。」
我：「咁如果唔係會點？」
「會生仔無屎窟…呀呀呀呀呀！」
我：「玩呀！等你生仔都唔知幾多年後啦。」
「會…會天打雷劈！」
我：「咁老套邊有人信，快啲話如果唔係就爛朘朘要切龜頭！」
「係…係…如果唔係就會爛朘朘要切龜頭。」




又幾順攤喎…講真我鎖佢手都鎖到痺晒。
我：「細蚊，攞張紙巾出嚟包住把刀，然後掟落樓下啲花槽度。」希望認得個位，如果佢再發爛…
細蚊隻手震晒咁放低我部電話，攞咗張紙巾出嚟包實把cutter，行去欄桿度掉咗落樓下…
我：「嗱，我而家鬆手，唔該你即刻消失呀下。」
「收…收到！多謝大佬！」
我一起返身，佢就屁滾尿流咁跑咗去走廊另一邊消失喺我哋前面，我諗…佢德性應該唔會再玩嘢。
蚊：「呀！你啲血流到出嚟！」細蚊用手掩住個口尖叫…唉，使鬼妳講咩，著咗黑色衫濕晒睇唔到咋，如果白色衫，我驚妳已經嚇到暈咗。
我坐咗喺地下上面，其實已經無晒力，重暈暈哋…
蚊：「使…使唔使叫白車？」
我：「唔太想…」我心諗呢啲刀傷分分鐘會驚動醫院差佬，到時供佢出嚟又唔係，唔供佢出嚟又唔係，畢竟都話放佢一條生路。




蚊：「對唔住…嗚嗚嗚嗚…」
有無人可以幫下我…細蚊真係無用豬嚟。
我用右手呵呵細蚊個頭，明明我係傷者，重要安慰返佢，無計啦，鬼叫我係仔咩。
我：「唔使驚，無事，應該死唔去…」
點搞好呢…行去藥房買料？定搵私家醫生…
車：「細蚊！」
咦，把聲咁鬼熟嘅…
車：「搞乜鬼呀你哋！做乜搞成咁？！」
蚊：「條仆街…攞住把刀喺身…」
車：「頂！我咪叫妳等我一齊放學！做乜自己走？點解唔聽我話？！」




蚊：「我見…交叉仔嚟接我…」
車：「接你…妳睇下而家搞成點？！」
我：「Carmen…唔好鬧佢…唔關佢事…我唔小心啫…」
車：「點呀？死唔死得去？」
我：「見到妳又點捨得死喎…」
車：「重講廢話，除衫啦。」
大卡車喺佢學校入面都算係一個奇葩嚟，話佢乖絕對唔乖，佢識啲大阿哥絕對多過我，所以佢先有信心可以同細蚊一齊放學，但佢又唔會喺學校蝦蝦霸霸，而且重要係學校嘅red cross幹事嚟，問你死未，最神奇係佢喺呢間學校算係讀得下書嘅一堆，我諗…Band3考第一唔會差過Band1考第尾嗰個好多掛…