我怎可能是女神👸🏻獵人🏹（第一季更新至斷更為止）: 115

大家唔好諗咁多啦，我同佢真係好似兩兄妹咁一齊生活㗎咋，唔通一男一女喺同一張床上面就一定要做嗰啲嘢咩？唔是的。加埋我係一個病人嚟，琴晚我好快就瞓著咗，至於Queenie佢有無留喺我身邊就真係不得而知，因為我朝早一起身就見到佢喺個廳度襯緊衫，搽下唇膏同埋上下眼線。
好彩我無再發惡夢，下下都夢見佢要走嘅話我真係頂唔順，我衷心希望，一切情況維持不變就好。
QQ青春活潑水潤鮮嫩，塊面滑過溫泉蛋，唔使化妝平時已經夠晒吸引，所以佢都只係輕微咁幫個嘴唇tune下顏色，幫隻眼畫得立體少少咁；我喺度認真咁諗，喺塊面上畫畫咁高難度嘅嘢都難唔到佢，點解烚個米粉會搞到一鑊泡？
女人，係一種好難理解嘅生物，當你理解到佢，其實佢已經係你嘅囊中之物。
Q：「卟。」佢輕輕咁將多餘嘅唇彩印落張紙巾上面，留低咗一張唇印紙喺枱面。
我：「嘩，女神唇印紙巾，攞返學校賣重唔發？」
Q：「你唔開我名嘅話，我唔介意你攞去賣。」
我：「吓，我重諗住附埋妳張學生相一齊賣…」
Q：「好似係你講過我唔可以販賣自己㗎喎。」
我：「嗯，講下笑啫。」我放返低張紙巾。




Q：「點呀你，瞓完一晚好啲未呀？」
我：「好返好多，無頭痛喇，係隻手重有啲痺。」
Q：「嗯，我差唔多出去喇，你晏晝食乜呀。」
我：「我諗住落去買粥食，不如一齊落去吖，送埋妳去搭車好唔好？」
Q：「其實我唔介意你喺我身邊，但同區嘅話都係怕好易撞到人，所以你唔好黐咁埋呀…同埋你得閒就諗定啲理由，如果撞到人或者俾人問起要點答，我都唔想話你想追我要做我隻兵煩鬼住我…」
唉，喺現實面…我最多都只可以做一隻想追佢煩住佢嘅變態兵；唔緊要啦，維護女神形象人人有責，而且就算喺旁人眼中，佢哋都只會咁睇我。
然後我就送咗佢搭巴士。