我怎可能是女神👸🏻獵人🏹（第一季更新至斷更為止）: 120

我：「咪都係咁…普通同學咁囉。」
鄧：「無…我喺你本週記見到上一篇俾人寫花咗，我認得係Queenie嘅字跡嚟，我驚你唔開心咋。」
我：「嗰啲好小事啫，佢都係攞嚟玩下。」
鄧：「你同佢相處到就好嘞，本來我想搵佢問下做乜寫花你本週記簿，但你知啦…女仔呢啲嘢好敏感㗎嘛，突然搵佢怕佢唔開心，所以問下你乜事先，如果只係你兩個喺度玩我就唔理㗎喇，不過你叫佢唔好再寫到啲簿花晒，我唔知校長會唔會得閒到連呢啲功課都check…」
睇到佢返工返到小心翼翼咁我都戥佢陰功豬。
我：「係呢，我想問下Q…Queenie佢改得啱唔啱？」Miss Tang教中文，所以我順便問下。
鄧：「佢有佢道理嘅，不過口語呢啲嘢唔會考，又無乜標準答案，所以你都係專心返平時教嘅書面語文啦，週記呢啲我想free啲唔會規限你哋點寫或者捉你錯字，但我都好推薦你用返書面語嚟寫週記嘅；我知道阿爽你對語文無乜興趣，我都明白有啲嘢唔係迫得嚟嘅，所以先搵Queenie同你坐希望刺激下你，你有嘢唔明都可以同佢討論下㗎，佢應該可以幫到妳。」
服咗Miss，明明咁後生都可以長氣到個阿婆咁。
我：「知道！咁我跑返屋企換衫！」
鄧：「唔好跑呀！一陣仆親就真係唔使返學…」




哈哈！第一次喺上堂時間離開學校，呢種感覺真係好特別，返到上去換返PE衫又衝返落嚟，大閘更亭入面個校工都好順攤咁俾我出入。
敲門入到課室Miss Tang都重喺度上緊佢嘅班主任堂，就知道我幾咁有效率啦。
當然，全班同學都望住我呢個唔係著校服嘅異類，而我亦都好勇敢昂首闊步咁行入去，唔會理佢哋嘅側目。
我：「好耐無見，右女神。」
因為考試週啲枱會拆返開同埋跟學號坐，所以到今日我同佢先又坐返埋喺一齊。
Q：「哈，重以為你俾訓導捉走咗無得上堂添。」
我：「點會呢，佢哋都唔會想嘥精神對住我呢條麻煩友啦，Miss Tang叫我返上去換褲咋嘛。」
Q：「嘻，你都係咁樣著比較正常。」
自從QQ出事鏟咗上嚟我屋企，一齊過咗個聖誕節，然後又考埋試，我竟然覺得坐喺佢隔籬上堂係一件好開心嘅事，以前上堂基本上我好少攞起枝筆，而家我有時會一路寫筆記一路傻笑。
小息嗰陣當然會有啲好朋友同埋無聊人嚟關心下我隻手到底發生乜事，為咗安全起見我都係一律答打波仆街就算，費事件事傳咗出去搞到學校擔心又麻煩到Miss Tang啦；雖然我係好想將我前日空手擒仆街渣男營救EX嘅英勇事蹟宣揚開去，不過都係算啦，而家已經有三個靚女知道我嘅威水史，其實我係有少少沾沾自喜，尤其係Carmen姐姐竟然重記得我同佢嘅約定。




著完兩日PE衫返學就到咗星期六，朝早我同QQ兩個已經做晒周末功課，試又考完佢都再無藉口阻住我打機；今日佢條仔要返學校唔知搞乜學會活動同埋謦project咁所以無拖拍，佢自己又無晒啲補習同學琴，可能悶悶哋就開埋傳說同我一齊玩。