我怎可能是女神👸🏻獵人🏹（第一季更新至斷更為止）: 121

健：『喂！死仔包又偷偷同Kuromi玩？！』
我：「Ku…Queenie，阿健條友仔又偷睇我啲戰績，見到我同妳喺度玩緊傳說。」
Q：「咁又點，想玩咪一齊玩囉。」
我：「但係，我唔知佢會點㗎喎。」
Q：「佢會…我畀個銀行戶口號碼佢我咪有錢使囉！」QQ轆大隻眼E起棚牙胸有成竹咁講。
我：「吓…妳講真㗎？」我真係無諗過佢會咁。
Q：「嗯…唔得，因為銀行轉賬佢會見到我個名嘅initial，到時就實知係我。」
我：「想問下乜嘢叫initial？」
Q：「哎，同你講都嘥氣，中二嗰陣英文堂咪教過乜嘢係initial囉，算啦，肯定你係啲連last name，first name，surname，family name，given name都唔識分嘅小朋友嚟。」佢一輪嘴咁講。
我：「我…真係唔識呀…可唔可以教我？」




Q：「你上年無上堂關我鬼事咩！」
我：「咁我上年又唔係同妳一班，可能無教呢。」
Q：「本書有寫㗎！唔通你個先生專登唔教咩？」
係…我心虛…重有啲驚…其實十二個月嘅英文我都好大機會唔可以串啱晒，今次真係唔知點算好。
我：「呀！佢邀我喇…」啱啱結算完上一局。
Q：「咁咪開囉，我又唔驚佢嘅。」
健：『喂，快啲拉Kuromi啦。』
我：「咁我拉妳㗎喇。」
然後第三個格仔入面就多咗個Kuromi嘅頭像係度，點鬼知佢唔係即刻開三排，而係喺度打字。
健：『Hi，好耐無見喇，靚女。』




Q：『Hello，但我唔靚㗎，Sorry。>_<』
健：『妳知唔知靚女最大嘅缺點係乜呀？』
Q：『真係唔知喎…@@』
點解要我睇住佢哋兩個喺度chat喎。
健：『就係靚女最鍾意講大話呀！』
頂佢重要喺度講爛gag，真係火都嚟，以為自己真係好風趣幽默咩，不過A0嘅佢估唔到都咁chat得，好彩我唔係要同佢爭住溝Kuromi啫。
Q：『多謝你讚我喎，開Game啦。^o^』
就喺咁，我哋終於開game揀角色。
Q：「你個好朋友同你真係夠晒friend喎，咁唔畀面你嘅？」QQ望住我竊笑。
我：「唓，係佢呢啲不切實際嘅人先會對女網友咁多遐想。」




Q：「咁又係，你日日對住我都一早厭咗啦。」
我：「邊係喎，都唔同，係兩回事嚟。」
Q：「到你揀人喇，唔好講啦！」
我望一望，QQ揀咗佢嘅萬年中路仙子，阿健個PK仔揀咗射手似乎係想show quali擦傷害值同人頭數威畀Kuromi睇，我又唔想做孤獨精上單，所以就揀咗輔助嘞。
一入到game，打野話佢玩暗殺流叫我唔好跟住佢，咪唯有跟住阿健囉，起碼做熟好過做生。
點知到咗第二波兵線阿健就：『咪食我兵線！』
頂！然後走咗去…佢意思即係叫我留喺度拖兵線同埋對面個上單，我真係屌咗出聲。
然之後中路就發生衝突，Kuromi，阿健同打野激戰對面嘅中路加打野，好好彩地贏咗領先2比0，佢再迤迤然喺條河行返嚟下路食兵線，佢同打野都係一殺一輔，QQ就兩輔，我就乜都無兼且無晒血要返泉水…哼！家陣當我係乜！