我怎可能是女神👸🏻獵人🏹（第一季更新至斷更為止）: 124

我：「Queenie…妳同條仔謦電話都無咁嗲喎…」
Q：「做乜偷聽我哋講電話？！」
我：「我唔想聽㗎，咁我間屋又唔係大。」
Q：「我驚佢認得我把聲咋嘛…」
我：「經過個咪都唔同晒啦，你哋又唔係熟。」
Q：「唔講喇，開局喇。」
玩開中單嘅QQ點會識用輔助吖，見佢打開個商店都唔知買乜我就決定幫下佢。
我：「買寶石先。」我咬住佢耳仔講。
健：「嚟啦，跟住我就得！」
妖，我勁想唔買寶石搶佢經濟囉，但我又唔想QQ掉分，雖然佢應該無乜所謂。




我：「下件買吟遊鞋，再跟住升水石，呢個輔助二技好重要，要加冷卻，不停放就不停有盾。」
阿健打野係唔錯嘅，QQ死跟住佢對面都無符，係難為咗上單同射手孤軍作戰，但由於佢殺到對面打野兩次，所以一直都無乜威脅。
我：「買埋長生護符，圍住佢轉，有血就幫佢坦，無血就喺後面支援，一打起上嚟就不停二技，開團就三技掉中間。」
健：「衝喇，我三殺呀！今次重唔贏！」
又真係好好彩俾佢一波贏咗，QQ不停開盾就連個射手都好似切唔入咁。然後又返到房間。
健：「愛麗斯係咪好易用呢，個角色又可愛，Kuromi不如妳再用佢同我打多場吖。」
Q：「但係…我無skin玩得唔開心呀。」
QQ把聲甜到搽咗蜜糖咁…
健：「咁呀，Kuromi妳鍾意愛麗絲嘅邊個skin呀？」呢條友仔到底想點呀…
Q：「愛斯基摩熊～」嗯…火大。




健：「Kuromi等一等，妳唔好off住喎。」
Q：「嗯嗯嗯。」
之後佢哋出咗房，等咗大概一分鐘QQ就收到封遊戲訊息，係奬品換領信嚟，阿健個死仔包竟然二話不說就即刻送咗個skin畀佢，價值510點券，圍返港子大概都成嚿水。
Q：「呵呵，有禮物收，開心死。」
我：「做乜要貪佢個skin喎，妳又唔係成日玩。」
Q：「有人願捱，我無迫佢㗎，都係等佢開心下。」
老實講我都幾不齒QQ呢個行為，但話返轉頭佢本身就係正統女神嚟，要做呢啲事可謂易如反掌，只不過屋企之前實在太有錢，根本就無需要收兵等進貢；況且佢有個穩定嘅男朋友，嗰度都攞到唔少贊助啦。
就係咁，佢哋又贏多場。