阿道弗斯:「呵呵,放咪放囉,人類啲肉又唔好食,尤其係勇者啲肉通常又輆又韌又臭!」
為咗我嘅生命,竟然要女神淪落至此…
阿道弗斯:「不過呢,我啱啱已經將魔種注咗入妳嘅身體入面,好快你嘅靈魂就會俾魔性侵佔,所誕嘅子嗣皆會成為我哋嘅一份子,到妳返到去王國將會受國民唾棄,世世代代都會成為被勇者獵殺嘅魔族!哈哈哈哈哈!」
我:「阿道弗斯!我要同你死過!」
阿道弗斯:「可以…點死過?」
我:「我都唔知…」肉在砧板上嘅我實在無能為力,要麼就同右女神喺度一齊自我了斷,要麼我就帶佢去到天涯海角繼續茍延殘喘喺黑暗之中。
阿道弗斯:「呀,其實又唔係無辦法幫佢還原嘅…」魔王一邊搲頭一路講。
我:「快啲講!係乜嘢方法!」
阿道弗斯:「畢竟將佢變做魔女又唔係我嘅本意嚟,呢啲只係副作用,係天下間每一個男人都有機會犯嘅錯,計我話,做人同做魔都無乜所謂啫,做魔女可以留喺度成為我嘅女僕都唔錯,不過呢,呢個右女神又真係有啲麻鬼煩,留佢喺度分分鐘會打攪到我恬靜清幽嘅生活…」魔王一路滔滔不絕咁講嘢,實在聽到人火冒三丈。
右女神:「我唔要做魔女…」


我:「夠喇!點做先可以還原?!」
阿道弗斯:「好簡單啫,就係喺七十二分鐘之內用大量人類嘅鮮血淋落女神度洗滌佢嘅身體。」
我:「魔王!快啲殺咗我!」
阿道弗斯:「睬你都傻,我殺人都唔見血嘅,整污鬼糟晒啲地方…呢啲嘢自己嚟啦,嗱,你而家腳前面有兩粒制,踩左邊嗰粒個鎖就會自動解開放你走,如果踩右邊嗰粒就會有兩把利刃伸出嚟劏開你兩邊手,咁你都走到…啲血應該夠用,如果無乜嘢我返返落地下城瞓晏覺先。」
右女神:「交叉仔!」
未等到右女神開聲我已經當機立斷咁踩咗去右邊粒制上面,由於長時間嘅枷鎖令我雙手早已麻痺,加上極端鋒利嘅冷刃迅速劃過,我感受唔到任何一點痛楚,取而代之嘅係一種寒冰感。
呢個時候我嘅身體已經重獲自由,只餘下一對手臂繼續掛喺行刑台上面,一滴又一滴嘅鮮血不往咁灑落染滿跟前嘅右女神。
右女神:「交叉仔!」
我:「主人。」我跌跌撞撞咁行咗兩步,跪喺右女神前面,任由整齊傷口流出嚟嘅鮮血傾注入女神嘅胴體之上。
右女神:「點解你要咁傻?!」


我:「為咗妳,無咗兩隻手算得啲咩…」
呢個時候女神俾我啲鮮血回復命燈,漸漸有返生氣,佢坐咗喺地上面擁抱住我嘅軀體。
右女神:「放心,我而家就帶你返王國搵最好嘅大夫嚟醫你,一定唔會俾你死;以後,我嘅雙手就係你嘅雙手,會好好侍奉你嘅第三隻腳…」
吓?唔係呀化,玩到咁都只係攞到女神兩隻手?好似有啲蝕喎,乜劇本係咁嘅咩?
Q:「仆街交叉仔!」
我:「嘩吖吖吖吖!」
已有 0 人追稿