Q:「頂你吖…好彩有咗上次經驗啫…如果唔係我額頭又遭殃。」QQ縮喺我側邊講。
我:「呼呼…我隻手…啊…」我用右手摸一摸左手,左手又摸一摸右手。
Q:「你無嘢吖嘛,又搞到滿頭大汗。」
我:「係咩…右女神妳無事吖嘛?」
Q:「我可以有乜事呀,係你瞓瞓下又喺度掙扎整
醒咗我咋,係咪又發燒呀?」
Queenie用佢嘅纖纖玉手摸摸我嘅額頭,一面不解咁望住我…原來我又發惡夢,梗係我前日同佢討論埋啲乜為咗佢會唔會放棄隻手出事,睇嚟我對佢太上心,點算…我應該要搵啲嘢調劑下令自己分心至得,日日對住佢我遲早思覺失調。
Q:「無發燒呀…做乜又發惡夢呀?」
我:「右女神,妳唔好變咗做魔女呀。」
Q:「哈…原來係我變咗做魔女,點呀,係咪要食咗你呀,興奮到你要捵床捵蓆咁。」


我都唔知點答佢好,頭先個夢真係令我好驚,原來自己為咗保護佢可以犧牲去到呢個地步,我又唔想同佢講返自己發咗乜嘢夢,因為佢實會笑我低B,為咗定驚我就扯住佢衫腳唔俾佢走。
話時話,魔王阿道弗斯到底係乜卵嘢嚟?
Q:「點呀,又成個細路仔咁。」
我:「受咗傷係咁㗎啦,妳應該安慰下我。」
Q:「唓,你又唔係為咗我受傷,點解要我執手尾喎,你瞓唔瞓返㗎?都差唔多要起身返學。」
望下廚房出面個窗原來已經天光,我終於逃離魔界迎來晨曦嘅曙光。
我:「而家幾點鐘呀?」
Q:「六點四喇,你隻手好返晒未呀?」
我:「我都唔知喎,又睇唔到嘅,不過係好痕咁囉,好想隔住啲繃帶搲下佢。」
Q:「都包咗五日點都埋口嚕掛,不如拆咗佢換返膠布啦,你唔係諗住繼續著PE衫返學呀,一陣啲先生同學以為你斷手㗎喇。」


我:「係嘅,就拆咗佢囉。」
Q:「拆攞,望住我做乜?」
我:「QQ幫我啦。」我遞高隻手放喺佢面前。
Q:「喂,你當我係乜呀?」
我:「護士姐姐。」
Q:「PK仔你唔好咁過份好喎。」
我:「好歹我養妳喺度,唔係為咗啲乜喎。」
雖然佢係女神,不過係落難嗰隻,只要你夠厚面皮,就可以為自己締造優質美好生活。
Q:「好,我忍你…」
Queenie著返盞燈,坐咗喺我床頭拍住我隔籬,首先拉開個扣,然後一圈一圈咁解開啲繃帶;我到而家都懷疑緊其實Carmen嗰日係喺度惡攪緊我,係都要包到我隻手好似木乃伊咁,由上包到下再由下包返去上,呢幾日焗到我hi hi…不過佢啲手勢又真係好好,每一圈都係整齊妥貼,鬆緊適中,同上下圈形成一條又一條嘅平行線。


Queenie繼續幫我解綁,去到最後幾圈嘅時候我同佢都發覺有啲唔對路,當條繃帶完全散開時,一包東西剛好由我傷口正上方跌咗落張床度。
Q:「欸…」我倆頓時無語…
已有 0 人追稿