我怎可能是女神👸🏻獵人🏹（第一季更新至斷更為止）: 134

其實呢幾日我有諗過有乜方法可以令我搵到錢。派私煙傳單？帶K仔？賣翻版？參加借錢黨？呢啲都係唔掂得嘅，況且而家已經無咗賣翻版呢個行業。
我見同我差唔多大嘅人仔都係去做M記，KFC，吉吉家呢啲…但我覺得，如果喺呢啲地方度做，就會日撚日都撞到熟人，人工又得最低工資，一更企足六七粒鐘好鬼辛苦，而且聽聞佢哋多數請啲足十六歲嘅。你話吖，譚仔請個鄉音阿姐都出到一萬七千幾，但啲快餐店就咁樣蝦㞗我哋啲學生，呢個世界，公平咩？！
如果我識鄉音，我都去做坦仔呀！就等我台山交叉仔嚟捧米線啦！講笑…都未聽過譚仔會請兼職學生哥嘅。
所以我決定去搵相熟嘅人幫下手…
於是我今日唔係去街市買燒臘飯，而係去屋邨酒樓度斬半斤叉燒。
馬：「交叉仔！咁錯蕩嚟買斬料返去做餸呀？」
當我重同緊個收銀阿姐找錢嘅時候，酒樓總經理馬叔叔就已經見到我過嚟同我打招呼。
我：「係呀，馬叔叔你好！」
馬叔叔係我老竇識咗好耐嘅一個街坊嚟，佢大我老竇少少，聽聞老竇重讀緊書嘅時候佢已經喺度做傳菜；老竇鍾意叫佢做馬神，唔係話佢賭馬逢賭必贏，甚至乎佢係差唔多唔賭嘅，不過佢對跑馬係有啲興趣會鍾意自己做研究，平時返工每逢賽馬日都會同啲茶客吹水交流；結果菜一傳就廿幾年，而水亦都一吹再吹咗廿幾年，當年嘅傳菜仔亦都變咗今時今日嘅總經理。大家記住係屋邨酒樓嚟咋，就算總經理都仍然住喺公屋度。
馬叔叔比較遲先結婚，返大陸娶咗個老婆落嚟，但就無仔女，原因我就唔知喇，我細個嗰陣同屋企落嚟飲茶嘅時候佢好鍾意撩我玩，又會送幾粒啫喱連埋把遮仔牙籤畀我…講到呢度先，再講個爛作者又會俾人批鬥呃字數。




我：「係呢…想請問下，你哋酒樓會唔會考慮請學生做兼職？」我攞住袋叉燒語帶尷尬咁問佢。
馬：「交叉仔想搵嘢做？」
我：「係呀。」
馬：「做乜呀？你老竇畀唔夠錢你使咩？」
我：「唔係…你知啦，平時我成日自己一個人喺屋企，想搵啲嘢做下充實自己，日日喺樓下踢波都會踢到悶啦，哈哈。」為咗睇落正常啲都要老作個原因出嚟嘅，唔通同佢講養女人咩。
馬：「哦，係咁呀，不如坐低先講啦。」
呢個時候五點鐘，下午茶班客已經清晒，夜晚飯局又未開始，個場冷冷清清我同馬叔叔就坐咗喺其中一張茶枱度斟斟。