我怎可能是女神👸🏻獵人🏹（第一季更新至斷更為止）: 135

馬：「交叉仔，你而家幾多歲呀？」
我：「上個月啱啱十五歲生日咗。」
馬：「咁你好細個咋喎，咁快就想出嚟做嘢？」
我：「呢個…有時間剩，咪想學下嘢，馬叔叔你放心啦，我唔係諗住玩玩下㗎。」
實情係無端端天降女神嚟滾攪我，令我唔可以再日日都喺度玩玩下…你估真係好想做咩。
馬：「咁你識做啲乜嘢呀？」
我：「傳菜啦，洗碗啦，洗菜切菜啦，執枱啦，掃地清潔啦，派傳單啦，都應該無問題嘅…」我諗到嘅都講晒㗎喇，我真係唔敢話自己識落單收銀煮餸，但我覺得蒸下點心呢啲我都OK嘅。
馬：「但係你重要返學㗎喎。」
我：「係呀，所以睇下可唔可以星期六日或者平日嘅夜晚嚟兼職下囉，到暑假嗰陣就日日都可以…」
馬：「嗯…」馬叔叔佢低頭沉思緊。




我就坐喺度靜靜咁等待佢嘅回應…
馬：「諗返起…你媽咪最後嚟同你飲茶嗰段日子，我又點捨得唔幫你吖…」
我：「即係…我可以嚟兼職？」
我聽到之後開心到想喊咁滯，多謝偉大嘅媽咪！多謝馬叔叔！
馬：「但我要諗諗有乜可以畀你做，喺酒樓做嘢唔係你想象中咁簡單㗎…」
我：「係嘅，呢個我都知…」
馬：「酒樓個廚房日日都打仗咁，唔同M記嗰啲㗎，就算你肯我都唔敢俾個未成年人喺入面開工。」
我：「嗯，都係嘅…」
馬：「而家啲客又好鬼麻煩，就算唔係你問題，見你細個都會蝦㞗你，專登製造問題為難你。」
我：「嗯，原來係咁…」




馬：「同埋今時今日無人派傳單㗎喇，我哋同啲行家都係喺Facebook page度貼下相，去OpenRice同啲地區社群度作下鱔稿，成本低好多…」
我：「嗯嗯…」
佢再講落去，我諗呢度真係無嘢可以畀到我做…
馬：「呀！可以搵你執漏喎！」
我：「請問…執漏即係乜嘢？」
馬：「交叉仔你平時早唔早瞓㗎？」
我：「唔算早，通常都過咗十二點，成點鐘先瞓。」
由於我就住喺學校隔籬，就算七點九先起身都可以趕得切八點鐘返到去，所以無乜早睡早起嘅必要，早餐我更加好少食，通常捱到小息先算。
馬：「執漏呢，即係話…咁嘅，我哋酒樓last order到夜晚九點半，廚房就十點鐘收爐走人㗎喇，按道理啲待應收銀都收工㗎喇，但係你知啦，唔係枱枱客都咁順攤㗎嘛，呢度有雀局，有人睇波，有啲宴會完咗留喺度玩，我哋好難即刻趕人走…平時呢，就可能要搵一兩個阿姐加班留喺度服侍班友，通常佢哋就會你推我讓，一係又要打孖咁留喺度謦欬有個伴…」
我：「我知！咁如果我嚟幫手嘅話，咁就所有阿姐都可以開開心心咁準時收工，你哋又可以慳返啲加班錢，而我就喺度等到班大帝走晒之後執靚返個場畀聽朝早茶用。」




馬：「嗯！叻仔！咁你覺得你做唔做得嚟呀？呢個位唔多使同客溝通，又唔使入廚房。」
我：「可以呀，我諗我無問題，都係落手落腳做嘅嘢嚟啫。」而且呢段時間好啱我，唔使驚我要為咗返工無人煮嘢畀女神食。
馬：「嗱，呢啲情況通常星期五六日同紅日就最多，咁你淨係呢啲時間嚟幫手好唔好？」
我：「可以呀，隨時都可以開始。」
馬：「不過有個問題…」
我：「係乜問題…」拜托唔好而家淋我冷水…
馬：「其實你得十五歲我請唔請得你？」