我怎可能是女神👸🏻獵人🏹（第一季更新至斷更為止）: 139

一入到去馬叔叔就叫我除咗件外套，然後攞咗件白色嘅短袖侍應衫畀我著，話好歹都等其他人分到我係嚟做嘢嘅，好彩我入面嗰件係短袖T恤嚟啫，如果唔係又好麻煩。
馬：「嗱，今日你第一日嚟開工，所以我照樣留咗一個阿姐喺度，個場而家重有十枱客左右，咁我將個場分做左右兩邊，右手邊呢四枱就交畀你去執，嗱，左手邊呢枱差唔多起身走喇，咁你去睇下阿姐佢點執，唔好問佢嘢，你眼見佢做乜，一陣自己就學佢點做，得唔得？」
茶樓開枱執枱，小學生都知有呢樣嘢要做，係咪真係有手有腳就做得？當中有無啲乜嘢技巧？我當然唔知，估唔到會有一日我要體驗呢種工作，我睇完阿姐執一次之後，到自己嗰邊有人走就又去執一次；阿姐執一張用咗兩三分鐘左右，而我就望住滿枱杯盤狼藉諗緊使唔使排次序…
執執下先發覺身邊有枱客原來係自己識嘅。
「咦！交叉仔你嚟咗呢度開工呀？」
係球場啲波友嚟嘅，大我幾年嘅哥哥，有啲已經中學畢業出咗嚟做嘢。
我：「係呀，嚟返part time搵下錢咁囉。」
「吓！我而家先知原來酒樓會請學生哥做part time！」
我諗呢樣嘢可能只會發生喺我身上。
我：「哈哈…我諗係我好彩掛。」




「唔怪之得呢排見你落少咗球場啦！」
其實最大嘅問題係QQ，我唔捨得掉低佢一個人喺屋企，而且一路望住佢我已經無咗蒲街嘅需要…
我：「咁…多方面發展吖嘛，有時間我都會嚟搵你哋打波㗎，我繼續做嘢先。」
「畀心機呀！交叉仔你得㗎！」
大約用咗十分鐘有多，我先執完人生第一張枱，再鋪返張新枱布上去。
馬：「堆波友你識㗎？」
我：「算係啦，喺球場打波時不時會見到。」
馬：「唔使咁驚喎，遇到熟人謦下欬好正常㗎咋，到你熟手咗，就可以一路做嘢一路同客吹水。」
我：「希望我可以有咁嘅能力啦。」
好快，我又要去執第二張，馬叔叔就一路喺收銀個位度離遠觀察我，之後就又教我做嘢。




我諗無乜小朋友真係想學喺酒樓做嘢，所以只係節錄返少少要點啦。