馬:「嗱,雖然啲碗唔係你洗,都唔好成碗油咁疊落去吖,放晒落盤水度就多多洗潔精都唔夠用呀,重有啲紙巾,雞翼骨,花生粒就最好唔好出現啦,你幻想下個阿姐七點鐘就返嚟洗碗,眼都未開就一嘢抹落隻碟度,你都唔想佢俾隻蠔殼鎅損手㗎!」
欸…洗碗應該會戴手套掛…
馬:「你要記住嚟任食打甂爐嘅人仔都係最麻煩嘅,錢就想畀最少,但就想食最多嘢,雖然廚房已經收咗唔使幫佢落單,但佢哋一日未熄晒爐都唔好執個自助區counter住,一陣佢哋無汁點就煩鬼死你,重有嗰度啲菜頭菜尾,佢哋臨走就會視之如珠如寶㗎喇。」
係咪講緊我…我次次都會去攞多包烏冬,撈落啲沙嗲湯度夾硬食埋佢。
馬:「雖然呢度唔係五星級酒店,個地下污糟就係人都知,你唔使嚟幫手掃地拖地,但如果見到成個龍蝦頭喺地下都幫手清咗佢啦,無謂拮到聽朝嚟飲茶嘅阿婆隻腳啦。」
重有好多好多…亦有各種類型嘅嘢要做;例如refill下啲牙籤桶,確保每張枱有齊聽日啲特價點心紙,抹下啲唔知點解油淋淋同會有飯粒嘅過膠餐牌,將啲液體廚餘同固體廚餘分開清理打包…
到咗十一點半啲客先走晒,十一點九到我就差唔多做晒啲嘢,馬叔叔就喺度埋緊數同點緊銀紙,即係話佢每日都要做到咁夜先有得走,然後到聽朝中午又要返嚟睇住個場,原來佢係咁辛苦嘅。
馬:「係喎…重未同你講有幾多人工。」佢一路幫疊錢用橡筋紮住放入經理房夾萬一路講。
我:「係…」我當然唔敢有乜要求。
馬:「就每日一百六十六個六毫六啦。」


我:「咁…零丁嘅?」
馬:「好零丁咩?」
我:「有埋毫子重唔零丁?」
馬:「即係每三日五百蚊呀,計多啲數啦!好彩原來你未夠十八歲唔使供MPF,如果唔係又多條數要煩。」
咦,又係喎。計落每日都係返兩個零三個鐘到,咁圍返時薪都有六七十喎,好過M記一截先…
馬:「係嘞,廚房雪櫃賣剩咗兩兜芒果布甸,放唔到聽日㗎喇,你如果鍾意就拎返去啦,雪櫃入面有淡奶自己加…」
雖然我呢個鐘數返工唔會有得包伙食,但原來都有啲著數喎,兩個布甸啱啱好夠我同QQ一人一個,太好喇;不過唔知佢瞓咗未呢,如果佢瞓咗就無辦法啦,我唯有抵諗啲一個人食晒佢啦,嘻嘻;QQ嗰個公主胃嚟㗎嘛,聽朝放到硬晒又驚佢食到肚痛就唔係幾好啦。
交帶完之後我就有得放工,點知我一出酒樓就見到QQ佢坐咗喺對開平台花園啲凳上面。
已有 0 人追稿