我怎可能是女神👸🏻獵人🏹（第一季更新至斷更為止）: 150

Q：「喂！點解你會喺度偷食㗎？」
我：「嗯？妳唔係瞓覺㗎咩？做乜起身…」
Q：「我個鼻話畀我知要起身睇下係乜事囉。」
呢個係咪豌豆女神嚟㗎，我只係打開咗個盒啫，啲嘢食已經攤凍晒唔會有煙，我又無食出聲，點解佢會發現我喺度偷食㗎。
我：「乜事都無，妳可以繼續睡寶寶。」
我唔理佢，放咗一條椒鹽骨入個口噒，加埋啲已經放到就嚟迴光返照變白米嘅飯一齊落肚。
Q：「喂，點解今晚我無份㗎？」
我：「哎呀，呢啲…唔係畀妳食㗎…」
Q：「點解唔係畀我食呀？你知我食乜唔食乜嘅咩？」女神用不滿嘅眼神望住我。
我：「嗯…人哋食剩㗎，費事啦。」




Q：「吓…你使唔使咁呀，頭先都食咗飯啦，竟然重要食人哋食剩嘅嘢？！」
我：「咁唔係普通嘅人食剩嘅嘢吖嘛，嗯…好味道…」我又噒返一條骨出嚟。
Q：「咁係乜嘢特別嘅人食剩㗎？」
我：「呢層…係三位姐姐…」
Q：「呀下…係咪好靚女㗎？」
我：「都算係咁啦，差過你少少。」
Q：「係咪即係姐姐話要同你打茄輪，你就會即刻（舌累）飯應伸條脷入姐姐個口度嘅質素？」
我：「這個嘛…咁我一向都願意為優質姐姐服務嘅…」例如幫姐姐清理佢哋食唔晒嘅食物。
我：「喂！妳做乜搶咗我條椒鹽骨呀？」
Q：「哼！你可以同人打茄輪質素嘅姐姐，我都唔介意食佢哋口水尾。」




佢已經唔等我徒手伸咗隻手埋嚟，攞走咗我一條椒鹽骨放入口喺度吮。
我：「其實呢，佢哋重食剩咗隻咁嘅嘢…」
我攞咗另一個膠兜出嚟，打開個蓋畀佢睇。
Q：「頂，瀨尿蝦都食剩！離晒大譜，乜而家啲女仔咁無衣食㗎咩？」
我：「乜妳未試過食剩嘢嘅咩？」
Q：「試過…再嚴重啲都重有…嫌塊牛扒太熟…食咗兩啖就放棄。」QQ佢慚愧地望住我講。
我：「我唔識點處理呢隻怪獸…」
Q：「得啦！交畀我就得！」
QQ繼續徒手攞起咗隻怪獸，呢個畫面同佢嘅美貌形成咗一個強烈不搭調嘅對比，對我做成嚴重嘅衝擊；QQ就好似手撕巨型曱甴咁屈佢個肚，然後極端暴力咁扯爛佢啲腳，最後抽走入面一條長長地灰色嘅肉出嚟，用牙咬啜入個口入面。
我：「妳唔使留返少少畀我㗎？」




雖然我唔介意佢同我爭食，但好歹都唔使咁霸道呀，呢個女神真係吖…果然係唯女子與小人難養也，唉，小女子…見到佢含住條蝦肉隻蝦尾重喺口外突咗出嚟我就深深咁感受到一種無奈。
而QQ就呆咗咁望住我，可能佢都覺得自己有啲對唔住我呢個將隻怪獸救返嚟嘅勇者。
點知QQ諗咗一陣之後，坐近咗埋嚟，將塊面貼喺我塊面前面，到底呢個女人想點，我唔係好get到佢想玩邊科。