我怎可能是女神👸🏻獵人🏹（第一季更新至斷更為止）: 151

佢見我無反應之後，於是用個蝦尾撩我個嘴唇…
佢係，想分少少蝦肉畀我食，用呢個咁嘅方法？
媽咪，我怕羞呀…但係我個身體已經不由自主微微咁擘大咗個口，感覺到條蝦尾慢慢咁侵入我嘅體內…
好近，真係好近，去到鼻哥掂鼻哥咁滯，兩對眼互相望到實一實；無嘢嘅，我哋都係為咗分屍隻蝦嚟食啫，唔好諗咁多，而且我哋都已經惜過…去到差唔多嘴唇互相碰到嘅時候，一齊咬落去塊蝦肉度再扯開。
可憐嘅怪獸蝦即刻被分做兩份分別落咗入去我哋嘅口度，原來…我同女神已經去到可以咁樣分吃食物嘅地步。
我：「我第一次食呢樣嘢，又幾得意喎。」
Q：「我都好耐無食過，雖然已經攤到凍晒，但都重幾爽喎。」
我：「Queenie，到我出咗糧，我再帶妳去食吖！」
Q：「傻啦，咪嘥錢呀，你都係做嗰一陣part time食乜鬼瀨尿蝦啫，留返啲錢買餸好過啦，或者你叫嗰幾位姐姐多啲去幫襯。」
我：「邊有咁好彩喎…我都想日日返工見到佢哋。」係囉，我都重未睇清楚個眼鏡傻豬姐姐。




Q：「哈，知你姐控喇，祝你早日俾佢哋輪茄輪…」
我：「唔好玩我喇，三唔識七，佢哋係去謦功課，唔係啲會喺條街遊蕩嘅不良少女。」
Q：「係囉，最衰係我，搞到你無得躝街溝女。」
我：「傻啦，點會關妳事…」
Q：「唉，俾你咁攪一攪，我又要再擦過牙。」
我：「嘻嘻，妳琴日唔記得擦牙就瞓咗。」
Q：「我知呀！到時我蛀牙就唯你是問！」
我：「咁都有得賴？最多我以後幫妳食晒啲嘢。」
Q：「你都黐線，你幫埋我擦牙就差唔多。」
我：「好呀，我而家都要去擦牙。」




於是，我哋兩個一齊入咗廁所擦牙，雖然係好鬼死迫，但都無所謂啦，一齊喺度生活已經慣。
然後我哋開始擦牙。
我：「係咪真係要幫妳擦埋牙呀？」
QQ佢無應我，但就放低咗隻手擘大咗個口。
吓…原來佢係嚟真㗎，我從來都未試過幫其他人擦牙；於是我攞起我隻牙擦，慢慢放入佢個口入面，掂住佢棚牙，開始來回咁拖。
QQ無乜特別反應，但就望到我實一實。
我竟然…用我擦緊牙嗰枝牙擦伸入佢個口幫佢擦牙，QQ啲牙又白又整齊，條脷係粉紅色，感覺上好健康，一定重健康過嗰啲我願意隨便同佢哋打茄輪嘅姐姐…
過咗一陣，QQ攞返起佢枝牙擦放喺我個嘴前面，我亦都自然反應咁擘大咗個口，佢用手將枝牙擦擦入我體內，不停一出一入咁磨擦我啲牙仔。
我哋…竟然喺度互相幫對方擦牙。
呢個動作係咪叫合巹擦牙？！又好似唔係喎，合巹呢個動作應該係交叉撓住手一齊幫自己擦，但我哋而家係互相幫對方擦，咁呢個動作係咪比起合巹更加高層次？




我唔知，唔識講，只係一齊住咗咁耐，我feel到我哋個心已經開始連成一線，只不過我哋無機會建立一個正式嘅關係。
擦完牙，我哋一齊上…各自張床。
Q：「交叉仔早抖。」
我：「QQ早抖。」