我怎可能是女神👸🏻獵人🏹（第一季更新至斷更為止）: 157

結果返到屋企已經無咗三串，剩返豬牛雞各一串；而為食嘅QQ一如以往個嘴角會揩咗少少沙嗲汁，我再重申一次我好想同佢打茄輪啜走佢嘴角上面嘅汁液，但呢個諗法只可以永遠存全喺幻想度，現實上返到屋企我當然係抽起一格紙巾幫佢抹返乾淨。
Q：「嘻嘻。」
初初識佢嗰陣，覺得佢讕係嘢，高高在上，恃住自己係靚女同埋有家底就俯視眾生；一齊生活之後，我同佢慢慢磨合變得越嚟越融洽，重變咗做好朋友；直到而家我開始諗辦法去打工搵錢養佢，再加埋佢個新髮型，我越嚟越覺得佢變到成個細妹咁…只係短短兩個月間嘅事。
係我長大咗吖？定係佢縮咗水呢？
我覺得佢都喺度enjoy緊呢個cosplay兄妹嘅遊戲，身為獨生子女嘅我哋，有個妹陪我係開心好多嘅，而佢都應該好樂於有個哥哥照顧佢。
但…拜託！我唔係戀妹控㗎…我需要嘅係一個女仔，唔係一個呀妹，可唔可以唔好咁對我？
但我幫佢抹完嘴之後見到佢成個傻妹咁望住我笑，實在係非常之毒…
我：「快啲去洗頭啦，傻瓜。」
Q：「多謝你讓我先喎。」
趁佢入咗去洗頭，我又攞多串雞嚟食；嗯，好味，早知再買多兩三串啦，而家嘅我應該負擔得起。




到QQ出嚟，上身又係得返個Bra，呢個妹妹嘅發育狀況真係好，身為哥哥嘅我當然要細心咁關心一下；然後佢就坐喺梳化搵張氈褸住自己攞起個風筒喺度吹頭。
Q：「我用到無乜熱水喇喎。」
我：「唔緊要，我啲頭髮咁短沖兩嘢就得。」
出返嚟之後QQ仍然坐喺梳化上面，著咗件hoodie，但明顯地入面又係乜都無嘅；其實冬天而家係長袖衫加埋厚啲所以都唔係話好覺眼，但係如果到咗夏天之後，我實在係不敢想像…
佢拎住塊鏡望住自己個樣，同埋啲頭髮，唔知喺度諗緊乜，女仔永遠係有好多時間望住塊鏡，右女神就更加尤甚，我諗佢照鏡嘅時間可以媲美我溫書嘅鐘數。
我：「點呀…六十蚊飛嘅髮可以嗎？」
其實我都知佢係迫於無奈，希望佢接受到啦。
Q：「差唔多啦，我小學嗰陣個頭都係咁。」
我：「我咪話妳個樣細路女咗囉。」
Q：「咁係一件好事定壞事？」




我：「好難講喎，我諗…細路女都會想自己睇落大個啲，而到妳大咗，就會想永遠都係咁年輕。」
Q：「我都驚我男朋友會覺得我個樣低B。」
我：「唔覺囉，驚就唔會衰十一啦。」
Q：「…，呀…如果咁呢？」
QQ佢攞起兩條橡筋，幫自己頭髮紮起咗左右兩條雙短馬尾，再一面期待咁望住我。
我：「妳係咪好想做小學生？」
Q：「哥哥…」佢重要瞪起對水汪汪嘅眼睛。
我：「做乜呀，呀妹？」
Q：「係咪養我啫？」
我：「邊有得唔養喎…」




Q：「哈哈哈，低B仔！」
我：「咁樣話阿哥，唔養喇！自生自滅啦…」
Q：「唔好啦，如果…咁樣呢？」
佢拆咗一邊橡筋，然後將另一邊推高，束起咗一蓻比較短嘅頭髮變做單邊噴水池。
我：「變咗一個曳嘅屋邨妹。」
Q：「有幾曳呀？」
我：「有協助及教唆他人與未成年少女發生…咁曳。」
Q：「真係㗎？」佢烏低身搖下搖下咁望住我。
我：「哎呀，唔玩喇，我去整嘢食。」
救命，再對多佢一陣真係會頂唔順，可唔可以是但整個女人嚟畀我頂住檔先，再咁落去我堅係會思覺失調。