我怎可能是女神👸🏻獵人🏹（第一季更新至斷更為止）: 156

見佢停止咗攻擊，我都停低落嚟，不過虞有詐嘅我仍然保持返兩呎嘅距離，以免佢一嘢踢落我雞雞度我就兇多吉少。
我：「無嘢吖嘛？有乜事咁檸樂？」
佢企喺度郁都唔郁，雙目呆滯，嘴唇微張…十足十嗰啲望住驗孕棒發覺自己中咗奬嘅女女嘅表情；我用隻手掌喺佢面前拂咗兩嘢，佢依然係無晒反應，妳唔係真係突然發現俾人攪大咗呀？我頂唔蒲㗎喎，妳搵返妳條仔哽呀…
我：「Queenie…唔好嬲啦…講笑咋…識咗你咁耐，點會唔知道妳係正經女仔嚟呢，對唔住囉。」
Q：「我同你一齊飛髮，返到去同學見到咪好奇怪囉？」Oops…我完全無諗過呢個點。
係喎…我哋兩個都重要由咁長剪到咁短，實在係超級起眼，但頭髮已經剪咗種唔返落去可以點搞呢？不過，我哋都係咁啱同一日飛髮啫，又唔係約埋一齊去剪，都唔算好怪呀？
講講下都發覺好難說服到自己，我同佢坐隔籬，過咗一晚之後就一齊飛咗髮，諗落都係好可疑。
我：「其實…我哋同一日飛髮，都唔係好大問題啫，有人問咪話我哋謦開頭髮太長想飛，點知真係放咗學就走去飛囉。」
Q：「妖，鬼唔知咩…但人哋點諗唔知㗎嘛。」
我：「算啦，唔好理人囉，好在妳男朋友唔係呢間學校。」諗落如果喺學校見到自己條女同隔籬位條仔同一日去飛髮，嗰種怒火中燒呢…




Q：「如果係，鬧架鬧到拆天都似…」
我：「嗯，見步行步囉，返去先算，可能想飛髮同打喊露一樣都係會傳染畀隔籬位，哈哈。」
Q：「你醒定啲呀，千祈唔好等人以為我哋一齊去飛或者約埋同一日去飛呀。」
我：「知喇…好在我都真係到咗啱啱要飛嘅長度。」但QQ咁大改變實好多人討論…
Q：「嗯，快啲返屋企洗頭，啲髮碎好拮肉。」
然之後我哋又一齊繼續行，到咗一個紅綠燈位嘅時候我哋啱啱撞紅停咗喺度等，QQ就擰轉面望住位於街角一間啱啱開門嘅小食店。
平時唔會成日經過呢度所以都無乜留意，而家停咗喺度就聞到陣陣濃郁嘅沙嗲香飄嚟，伴隨住少少燒燶肉嘅味道。
我：「係咪想食呀？」
Q：「無所謂喇，唔好嘥錢啦。」
咁即係想食啦，都知妳為食豬，平時我自己煮來來去去都係嗰幾樣早就知道妳悶晒。




我：「街邊檔有幾貴喎，咪去買嚟食囉。」
於是乎我就捉住QQ隻手腕拉住佢去到店面，望一望，牛十二蚊，豬十蚊，雞八蚊；嗯，唔算貴，都唔太平，其實我自己都好耐無食過好嘢，因為要慳錢留畀QQ用。
我：「唔該豬牛雞各兩串吖。」
Q：「吓？愛咁多！」
我：「買嚟當做餸囉，喺屋企又整唔到。」
老闆就根據我嘅order放咗六串肉上個烤爐上面燒，燒完就浸落罌沙嗲醬度再入落袋交畀我，而我就將六十蚊交到佢手上，買完串燒我同QQ繼續返去等紅綠燈過馬路。
等等下QQ用手拉扯我手臂。
Q：「喂喂，我要食。」
我：「吓，咁心急？」
Q：「人哋想趁熱食吖嘛。」




我當然慣咗通街食嘢㗎啦，估唔到右女神佢…
我：「嗱，自己揀啦。」我打開個袋畀佢。
跟住QQ就攞住枝串燒牛一路行一路食，加埋個新髮型真係成個細路女咁，我就好似喺度湊緊細妹返屋企…但係見到佢食得咁開心嘅樣，我就覺得點都值得返晒。
然後，佢剩返最後一粒牛先嚟畀我，再攞起一串豬，睇怕…都係唔使指擬今晚諗加餸。