我怎可能是女神👸🏻獵人🏹（第一季更新至斷更為止）: 160

無驚無險又返咗一日學，今日放學QQ會走去同男朋友偷情…呀，唔係，係拍拖至啱…就算係偷情，嗰個對像都只會係我而唔係佢正室；QQ飛完髮之後好似心情輕鬆咗，就連神情都活潑咗咁，重話諗住一陣要紮個單邊噴水池頭睇下男朋友會有乜反應。
呸！死人有錢仔，你都係執我二攤咋，我一早就欣賞咗QQ嘅新髮型。
或者，把心一橫剪走啲長髮真係會方便打理舒服好多嘅；QQ都同我講過以前喺自己屋企其實無乜自由，日日都要補習學琴或者參加其他課外互動，為嘅就係整靚自己個profile，要好艱難先攝到時間出嚟同男朋友偷偷拍拖；嚟到我呢度之後雖然生活水平差咗好多，但就自由自在，所以都過得好開心。
或者，千金小姐呢個名份同一頭長髮一樣，某程度上都算係一種負擔。
難得我自己一個，放學做乜好呢？本來都想去中心度玩下hea下，不過阿健又話喺街玩太lag，要返屋企用Wi-Fi打傳說，既然係咁我都無謂自己一個去，於是就速速歸家打機算。
係咪好頹廢？其實大部份學生都係咁㗎喇，打波，打機，睇動漫，玩玩具，諸如此類；你以為香港嘅中學課程真係好艱深呀？事實係因為我哋不務正業，啲時間唔喺擺係功課同溫書度咋；我都唔明，點解我一個大好初中生要搞到日日洗衫煮飯，周末重要去打工喎。
咪因為妳囉，Queenie…我鍾意妳呀！衰妹，同男朋友拍拖就叻，上床就永無托手肘…可唔可以同我拍一日拖呀，做下樣都好吖…
算，唔諗無謂嘢，開電話玩先。
今日專登唔同阿健打，自己一個單排；結果，打咗八場四贏四輸得個桔，乜都無做過咁滯，好在啲場次積分幫我攞返一粒星。
「咔嚓。」係QQ開門嘅聲音。




真係準時，大概七點就返到嚟，應該係佢條仔都夠鐘返屋企開飯。
我：「返嚟嗱，等妳一齊做功課好耐喇。」
Q：「嗯，都係…今日好多功課下。」
自從一齊住之後，我哋都會一齊做功課，正所謂人多好辦事，事半功倍吖嘛。
我：「妳係咪同條仔食完tea㗎喇。」
Q：「係呀，食咗個all day English breakfast。」
講完都唔知佢食咗啲乜，應該係食咗一堆雞腸，唔深究嚕。
我：「我頭先都食咗個杯麪，咁我夜啲先整小小嘢食啦。」
Q：「嗯，開工啦。」
當我哋鋪晒啲功課喺枱面之後呢，QQ忽然若有所思，跟住一面疑惑咁望住我問：「交叉仔…想問下，呢間屋有無鬚刨㗎？」




我好似見到外星人咁望返住佢：「乜…女仔要剃鬚㗎咩？」
對於佢呢個問題，我覺得實在係好艱深，難以理解嘅程度更甚於嗰條我諗咗成年都未諗通嘅log m+log n=log mn…