其實QQ已經帶咗畀我無數嘅第一次,唔計一齊住,佢令我第一次溜冰,第一次反工兼出糧,第一次去五星級酒店食嘢,第一次同Miss隔住道鐵閘玩,第一次感受到溫完書係有進步,第一次鍾意一個女仔唔係為咗食佢,第一次幫女仔剃胳肋底毛…總之同佢一齊就好似成個世界唔同晒咁。
喺屋企又對住,喺學校又對住,唔好以為我哋會有無窮無盡嘅嘢講,好多時都係慣咗對望一眼,微笑一下,然後就會心有靈犀咁繼續做自己嘢;喺呢一刻,我哋就各自安靜咁品嘗點心,飲兩啖茶,享受一個寧謐恬然嘅下午。
上茶嘅時候待應已經放咗碟三合一辣椒醬喺度,我都唔知用落邊度好;記得我細個嘅時候,嗰個重有遮仔牙籤啫喱嘅年代,一埋位就會有碟仔豆瓣醬放喺枱面,呢樣嘢已經消失咗,當然你叫到係重會有嘅。而呢碟三合一,分別就有紅辣椒醬,XO醬,同埋辣椒䜴油;羊毛出自羊身上,巾芥一早已經包晒落啲點心價入面,不吃白不吃,於是我就用筷子夾咗啲XO醬入面嘅瑤柱絲同蝦乾嚟食…嗯,好Q好味!
Q:「呢度啲辣醬好好味㗎。」
QQ見到我個樣都知我食得津津有味,佢自己又夾咗少少XO醬放入個口度。
我:「可惜吖…都唔知可以點乜。」
其實燒賣都可以點嘅,但呢度啲點心本身已經好好味,用辣醬冚咗原本啲味又係非常大嘥,無炒粉麪真係唔知點用…我勉為其難咁撕咗少少菠菜餃皮出嚟配晒三種辣醬食,都係好出色,各有千秋。
Q:「我以前都無理過嘅,不過喺呢度就真係未試過食剩嘢,因為全部都好好味。」
我:「如果你同屋企人嚟食會嗌幾多嘢㗎?」
Q:「飲茶咪嗌七八籠點心囉,加排叉燒,再加碟炒粉麪咁,佢哋都唔係大食,但會點啲靚茶囉,你又唔使想像到我哋會晏晝走嚟鋸鮑魚,未有咁過份嘅。」


我心算咗一陣,即係三個人加埋一都成二千。
呢個時候上小籠包,每隻都有個竹托秤起,等你唔會夾穿,半透光嘅皮上面摺得非常靚,重感覺到薄皮入面啲湯汁喺度搖下搖下。
Q:「唔好諗咁多啦,我有蝦餃食就好開心。」
我:「嗯,妳開心我就開心。」
食完個小籠包,等咗一陣就有一塊和牛酥奉上枱面。
我:「呢個…得一件…」
Q:「你食吖,我嗌畀你試,我覺得你會鍾意食。」
我:「一人一半啦。」
Q:「唔好啦,費事整到碎晒,我食過好多次喇。」
我:「咁樣我會唔好意思。」


Q:「唔使唔好意思,因為我好細食,所以你一定要食得多過我,嚟啦,乖乖哋。」
我:「既然妳咁講,我就聽話啦。」
其實嗌咁少嘢,莫講話我,QQ都唔會飽啦,但無辦法,我哋要睇餸食飯,可以坐到喺度已好難得。
呢度嘅蛋撻係寫到明要等廿五分鐘,即係現場即做嘅,咁食落都係好好味,非常新鮮熱辣辣,個蛋漿嘅味道係好濃郁,係稍嫌細咗少少啫。
食完蛋撻,即係已經嚟到尾聲,待應就幫我哋執走隻碗碟,筷子,set辣椒醬,當然啲XO醬碎就俾我清晒啦,齋食都好鬼好味。
最後就係奉送嘅美點雙輝,同埋…
Q:「咦…我哋無嗌呢個喎?」
已有 0 人追稿