我怎可能是女神👸🏻獵人🏹（第一季更新至斷更為止）: 219

我哋喺IFC對開嘅行人天橋上面，QQ拖住我一面興奮咁行去中環碼頭；呢個時間正值上班族嘅放完飯回歸社畜生活時候，所以一路上都有好多人，好似螞蟻回巢咁由四方八面竄返入屬於佢哋嘅辦公室商廈，而我哋兩個就喺人群中左穿右插。
我：「Queenie，咁妳即係想去邊度呀？」
Q：「唔係尖沙咀就得。」
我：「都要有個地方㗎。」
Q：「中環可以搭船去邊度㗎？」
我：「長洲…大嶼山…紅磡…好多㗎喎。」
Q：「紅磡都唔得。」
我：「咁即係唔要過返九龍啫，妳揀個目的地啦。」
Q：「嗱，我哋落到去，睇下邊班船最快開就搭邊架啦，就咁決定。」
妳都幾亂嚟㗎喎，即係企喺個巴士站度，下一架巴士嚟到無論去邊都要上車嘅搭船版，呢個遊戲對於日日都自由自在嘅我嚟講係可以隨便玩，不過正常人唔會自己一個人做埋呢啲無聊嘢，而且去到唔知邊度最後咪又要返屋企。




但係同QQ一齊就唔同，好似做乜都係會咁開心。
Q：「喂，睇下！嗰個碼頭泊咗架船喇，快啲跑過去睇下係咪就開。」
QQ扯住我跑落樓梯，好彩我身手都唔錯，如果唔係一戟隨時兩個一齊轆落樓梯。我哋一路跑過幾個碼頭入口，嚟到泊咗船嗰個入口。
Q：「喂！重有兩分鐘就開船喇，快啲入去啦。」
我哋剩係望到個鐘顯示住14：30，連架船去邊都唔Q知就拍八達通衝咗入去，今時今日嘟一嘟就可以上船好方便，如果重要買飛嘅話睇怕實趕唔切；而搭船要幾錢呢？十九幾蚊都唔使，係十八個幾啫，都幾平喎，雖然唔知架船去邊度…
我哋兩個盲樁樁衝埋上架船度，幾乎一踩上去個水手已經收跳板咁滯…
Q：「喂，你喺度轉嚟轉去做乜呀？」
我：「想睇下架船去邊啫。」
唔知大家有無呢啲經驗，就係上咗巴士之後先懷疑自己有無上錯車，於是就喺架巴士車廂入面搵個路線牌，而家啲實體紙牌已經買少見少，而咁啱個電視路線牌又故障中，問司機又超尷尬…
Q：「你係咪傻㗎，都上咗嚟，賊船都要搭埋佢㗎啦，唔通跳落海咩？」




我：「咁知道去邊，可以諗定有乜做吖嘛。」
Q：「有乜做？咪服侍我囉。」