我怎可能是女神👸🏻獵人🏹（第一季更新至斷更為止）: 221

作為一個文化人，我係唔忍心睇到廣大學生沉迷口語爛文不能自拔嘅，所以我又嚟好文推介，自認係乖仔又想DSE中文有星嗰啲就自己執生，今次係傳統文學；華嚴嘅《智慧的燈》，係我人生第一本睇嘅青春愛情作品。
http://www.haodoo.net/?M=book&P=1212#!

Q：「佢由細到大都係想嫁個有錢人咋嘛，讀讀下書就逃學跟男人走，恃住自己靚女就乜都唔想做，淨係使男人錢，飯又唔識煮，只係不停用錢幫我報乜班物班，去補習，自己就同其他少奶奶飲飲食食，亂咁使錢，識埋啲唔三唔四嘅男人，而家重衰到要同我個班主任講大話…我初初都以為老竇出事係為咗整蠱佢，到而家失咗踪咁耐我先信係真出事，好呀，咪等佢捱下囉。」
我：「其實K生知唔知佢啲嘢？」
Q：「知唔知都係咁樣啦…佢都就嚟六十歲，重理得啲乜喎，理都理佢自己盤數先啦，明明簡簡單單啲錢就可以用過世，就連我都可以唔使做，係要玩到出事先安樂。」
我：「但點解佢可以唔理自己個女㗎…」
Q：「佢重有個前妻同對仔女喺美國，理得幾多？」
我：「原來…」我都唔知講乜好喇。
Q：「所以你唔使唔開心，我覺得你過得好幸福。」




嗯，可以同妳一齊生活就無比幸福，QQ妳就好似係我媽咪派嚟陪我生活嘅天使一樣，所以無論如何，我都會盡力令妳生活過得好。
過咗陣架船就到咗南丫島，落船之後係一條好長嘅石壆，長到可以喺度練短跑唔驚飛咗落海。
Q：「喂，唔好諗住剩係出嚟陪我玩，你今日係有任務在身嘅，知唔知？」
我：「吓，任務？山長水遠嚟到呢度有乜做？」
我有一刻諗過佢會叫我搵個無人嘅荒山野嶺或者沙灘叫我服侍佢嘅下半身，等佢可以喺個四下無人嘅曠野嗌到不亦樂乎，再狠狠咁呂布佢…哎吔，睇唔明就唔好問我，問返個爛作者啦，佢見過鬼都怕黑，點敢好似啲出埋實體書嘅名作咁用嗰兩粒字嚟做書名呢？況且我都考唔到第一，Queenie都考唔到，叫我考得好過佢都重有少少可能嘅。
所以想睇甜嘅就暫時死咗條心先啦。
Q：「嗱，我IG好耐都無up過相，今日靠你喇。」
我：「哦，原來係要吸引狗公。」
Q：「狗公你個頭，你就狗公，呢啲叫粉飾櫥窗，英文就係window dressing。」
我：「知喇，知妳哋辛苦，去玩都要諗咁多嘢。」