我怎可能是女神👸🏻獵人🏹（第一季更新至斷更為止）: 222

Q：「我想㗎，個個都係咁有乜辦法，你唔係以為啲女神日日去酒店high tea，個個暑假有得船P，得閒無嘢做就走去沙灘睇日落呀？全部係平時打仗咁影定啲相返嚟再慢慢貼㗎，有無聽過去一次歐洲可以貼足三年呀？」
我：「妳哋嘅世界真係虛偽…呀，咁頭先食蝦餃妳又唔叫我幫妳影，咪嘥晒囉。」
Q：「文華貼過三次喇…有機會去扒房食威靈頓牛扒先再貼啦，如果有…太重複會俾人話生活枯燥㗎，同埋你咁難得可以去一次，我想你可以專心食嘢同享受個環境吖嘛，咁先至係你嘅體驗，而唔係為咗陪我去。」
我：「Queenie妳真係體貼，咁…平時啲相係咪都係你男朋友幫妳影㗎？」
Q：「一啲啲啦，可以嘅話都唔想勞煩佢。」
我：「吓…幫女朋友影相唔係應該好開心㗎咩？」
Q：「永遠無得出鏡你估佢開唔開心？」
我：「係嘅…咁佢會唔會呷醋㗎？」
Q：「呷飽佢，我兵都無收隻，重想點？」
知妳清純喇，兵都唔收但就同第二個男仔住。




我：「其實妳都有男朋友，唔玩IG都得啦。」
Q：「呵，這可是兩回事嚟的，男朋友還男朋友，IG係自己嘅，同埋男朋友又唔係過世嘅…如果想我唔玩，你叫晒全天下啲八婆都唔好玩我就有得抖。」
係嘅，如果全天下學生唔溫書，咁我都可以唔使溫，如果全天下女人都著Uniqlo，咁佢哋就唔使嘥咁多錢同時間買衫，執衫，襯衫…
Q：「嗱，用我部電話影啦…」然後佢unlock咗畀我，一齊住咗咁耐都係第一次掂佢部電話。
我：「入面有無閃卡睇㗎？」佢死魚眼望返住我。
Q：「點都有啲好睇嘅嘢嘅…不過你應該唔想見到㗎喎，平時重睇唔夠咩？」
我：「無呀，我驚㩒錯制彈咗去妳相簿，一陣睇到妳同男朋友啲特技動作就唔太好，講定聲先啫。」
Q：「無呢啲呀，都係2B+++嘅級別，未到三級。」
呢個級別已經係好鬼好睇，太露骨反而無癮。
我：「等我影個海試下先…咦，影完點睇返幅相？」




Q：「有無搞錯呀，電話都唔識用！」
我：「我都無用過Apple！」