我怎可能是女神👸🏻獵人🏹（第一季更新至斷更為止）: 266

我：「食團年飯呀？」
Q：「係呀，咁你係咪去舅父度食飯？」
我：「本來都諗住去，而家既然妳約咗媽咪就一定去啦，食完就趕去返工；係嘞，妳同媽咪食團年飯，會唔會無端端多咗個新老竇㗎？」
Q：「啋，千祈唔好，咪搞我，我唔理佢搵到半打老公，唔好搞到我就得，我唔要任何麻煩。」QQ講到反白眼咁滯，希望呢個唔會係事實嚟。
我：「有daddy…咪有零用錢囉，唔好咩？」
Q：「相金可以先惠，其他免問，走走走。」
我：「實在唔係好明點解妳媽咪可以掉低妳同個男人一齊生活…過意得去㗎咩…」
Q：「是但啦，佢個女都同緊個男人一齊生活，可能係遺傳嚟，掉轉嚟諗我掉低佢都好過意得去。」
我：「唔知佢會黐埋落啲點嘅男人度呢？」
Q：「佢有佢識朋友嘅自由嘅，我唔會質疑佢，斷估應該都過得開心掛，如果唔係就走咗佬啦，唔好搵我喊就得，我幫唔到佢。」




我：「真係會過得開心咩？」
Q：「唔知，唔見得我爹地喺度嘅時候佢有幾開心，不過使錢係OK開心嘅。」
我：「或者佢換咗男人屋企住都唔同妳講。」
Q：「唉，都話無所謂。不過呢，可能我第時有一日結咗婚，同老公鬧大架，或者又落難，我諗我都會嚟煩住你。」
我：「到時妳照顧自己都得啦。」
Q：「同你一齊住好玩嘛，又有人煮嘢畀我食。」
聽到佢咁講個感覺其實好mix，開心係因為佢會記得我同埋覺得一齊住好玩，唔開心係…如果妳到時有老公，咁我會唔會有老婆？天下間有邊個女人會容忍自己老公嚟畀妳滾搞，定係我要一直保持單身standby喺度隨時接濟妳？
Q：「係嘞，我聽日都會去拍拖。」
我：「聽日星期日嚟喎。」
Q：「星期日拍拖又有乜問題，放假去玩唔係好正常咩？」




我：「佢屋企人唔係會喺度咩？」
Q：「妖！聽日無諗住扑嘢呀，係咪要我每次報告埋畀你聽你先安樂？」佢個樣唔知好嬲定好笑。
我：「咁…又唔係嘅，只係諗緊嚟緊又新年…」
Q：「唔使諗喇，今年初七人日加情人節係星期一，等下唔使死嘅。」
我：「哦，原來係咁，已經一早計好晒。」