我怎可能是女神👸🏻獵人🏹（第一季更新至斷更為止）: 267

由於小弟係一個毫無計劃嘅人嚟，基本上兩日後嘅事我係唔會理嘅，所以我數晒十隻手指都數唔出究竟初七係幾時同星期幾。
Q：「你都搵個女女玩下啦，唔好喺度煩住晒，不過唔準做嗰啲嘢㗎。」
我：「無端端去邊度搵個女女喎。」
Q：「我點知啫，你唔係溝女好叻嘅咩？」
我：「拍過拖啫…唔等於溝女叻嘅。」
關於女女呢樣嘢…又唔係完全搵唔到嘅，不過呢一刻嘅心又確實無呢個諗法，睇下今晚會唔會有啤酒妹姐姐陪我吹下水啦。
食完飯QQ攞咗隻滑鼠入去沖涼，唔止添，重拎埋塊keyboard；雖然唔係啲乜嘢RGB貴嘢，都希望佢小心啲，唔好傻到搵花灑淋或者放落水浸，我未想換新嘢住。見佢喺度洗嘢，我都搵啲嘢做，於是就裝咗桶水喺度拖地，當做下樣啦。
搞下搞下好快就到咗夜晚。
Q：「嗯，你今晚咁早返工嘅？」
我：「呢排多客吖嘛，咪早啲落去幫手。」




女人真係敏感到吖，我只係比平時早咗十分鐘出門口咋喎，又會咁都察覺到嘅…咁我認係想早少少落去睇下Angel喺唔喺度嘅，不過我就唔係對佢有意思喇，係純粹覺得同佢吹水幾開心。
其實係有食咗佢嘅意思，不過唔可以咁做。
A：「咦，你落嚟開工嗱？」
我：「係呀，我去著返件白恤先。」
Yes！太好喇，又見到Angel姐姐，有啤酒妹嘅一天就係好嘅一天，今日要繼續畀心機做嘢！
做嘢嗰啲同平時差唔多就唔講喇，不過只要一有空閒時間，我哋就會把握個罅隙謦返幾句，首先就接返落琴日嘅話題度先。
我：「Angel姐姐，做乜妳得十八歲就做啤酒妹嘅？」我覺得呢個組合嘅神奇程度同我十五歲嚟酒樓打工差唔多。
A：「無錢咪要做囉…你估由得我揀咩。」
我：「我都知係為錢要做，但點解係啤酒妹呢份工嘅？」
A：「咁啱㗎咋，我日頭喺間首飾店度返工，嗰度有個師姐介紹我做啤酒妹，咁我咪膽粗粗試下囉，都係做咗兩個幾月，之前聖誕好等人用就搵咗我嚟頂。」




我：「吓，妳要返兩份工㗎？咁咪好辛苦？」
A：「少少啦，咁啤酒妹都係節日先多工開啫，平時都只係返下周末，好在我朝早份工唔算辛苦，主要都係坐喺度玩下電話浪費時間。」