我:「點解咁講呀?」
A:「有無聽過聖經入面窮寡婦奉獻嘅故事?」
我:「無呀…我間中學無聖經堂。」
A:「雖然我間中學都係不知所謂,但作為一間天主教學校都會有啲故仔聽下嘅,咁有一日耶穌就喺聖堂睇啲信眾捐獻,有啲有錢佬都捐好多下,但有一個窮寡婦只係放咗兩枚銅錢入個箱度,然後耶穌就同佢啲門徒講,呢個婦人比起其他所有人都奉獻得更加多,因為其他人只係將佢哋多餘嘅捐出嚟,而佢就將佢僅餘嘅生活開支都奉獻咗畀神。」
勢估唔到一個啤酒妹會同我講耶穌,好在佢唔係讀佛教學校,如果唔係同我講佛偈就實在太格格不入,我會想剃光佢個頭等佢做賣啤酒嘅小尼姑,保證個天跟住一定會落大雪,到第二朝發現佢飲得太多啤酒凍死喺雪地上重帶住微笑。
我:「喺喎…十點幾喇喎,姐姐妳唔收工?」
講耶穌,時間就會過得特別快,因為神歡迎你早登極樂,回到天鄉。
A:「都重有十幾台客,咪等我賣多陣酒先囉,而且呢度有你陪我,我返到屋企都無嘢做。」
我:「妳鍾意囉…但就算女神鍾意我又可以點,現實就係現實,窮寡婦嗰兩枚銅錢確實幫唔到教會幾多,最後咪又係要靠有錢人。」
A:「未必嘅,你咁有心,神會眷顧你嘅。」


我:「但我無信佢喎,咁都會眷顧我?」
A:「佢唔眷顧你,女神眷顧你囉。」
我:「耶穌好似講過話除衪以外,沒有別的神㗎喎…」
A:「哈,原來你都知佢講過乜。」
我:「咁呢啲常識嚟嘅啫。」
A:「我都無入教㗎喎,我諗耶穌嘅主旨係叫我哋做好人,如果你做到嘅話,應該比信佢更重要。」
哦,即係呢位姐姐…都係一個吹水唔抹嘴嘅人嚟。
我:「我諗我暫時都叫好嘅…」
嚴格嚟講我都無非禮佢吖,望佢呢啲又係佢自己俾我睇嘅,掂下佢又唔會反抗,我都唔覺有啲乜行為係我做咗係會令佢唔開心。
A:「你為佢做到咁,就算本來唔鍾意你都會夾硬自己鍾意你啦。」


我:「我…唔係諗住咁,唔鍾意咪唔鍾意囉,做乜要勉強自己喎,只係如果我唔搵錢嘅話,一係睇住佢餓死,一係我同佢都半餓死,真係搞唔掂。」
A:「無話勉強嘅,女仔唔同男仔,男仔可能睇完樣就有結論,鍾意就鍾意,唔鍾意就唔鍾意,但女仔呢,係好講感覺㗎,當佢有機會同你相處,慢慢感覺到你對佢嘅好,自然就會意亂情迷,相反地,亦都係可以本身一見鍾情,但相處落發現到條仔嘅不知所謂,然後一日一日咁增加恨意。」
我:「遲啲先諗啦…我又改變唔到啲乜。」
到大概十一點鐘,好多客都起身走人,我就忙住清理啲災場,而Angel佢見到咁上下都換衫走人;唔知點解,我覺得著住便服嘅佢重正,但明明啤酒妹制服就好多嘢睇。
咁又一工,返工,同返學,都差唔多啫。
已有 0 人追稿