我怎可能是女神👸🏻獵人🏹（第一季更新至斷更為止）: 269

我：「我哋…無攪過…至少而家…而且佢係有仔…」
A：「有仔你重養佢，貼錢畀佢溝仔呀？」
我：「咁又唔會，條仔應該都俾佢食咗好多…」
A：「唔好咁傻啦，呢個係佢哋屋企嘅問題，你幫得一時都幫唔到一世，咪等佢媽咪諗辦法，等社署幫手，等政府負責囉。」
我：「但係佢已經嚟咗我屋企…唔通趕佢走咩…」
A：「你好鍾意人哋？」
我：「我…呢個…」
A：「唔使怕醜喎，話畀姐姐知，我又唔會笑你嘅，亦都唔會同人講。」都無人俾你講啦…
我：「我都好想鍾意，但係邊有資格…」
A：「點解咁講呀，鍾意人都要講資格嘅咩？」




我：「佢又咁靚女，讀書又叻，多才多藝…係學校公認嘅女神，呢啲機會幾時輪到我…」
其實最大問題都係佢做開富家女，不過我就唔同姐姐講嘞；本身我同QQ就係兩個世界嘅人，一齊住玩下家家酒就得，如果將來要一直兩個人生活落去，我完全無信心。
A：「但係佢已經住緊係妳屋企喇喎。」
我：「嗯，我好想可以令佢幸福，日日都過得開心，但我知道自己根本乜都唔係，我唯一可以做到嘅嘢，就只係令佢可以有飯食…」
A：「喂喂喂…你唔好喊呀，返緊工㗎…嗰邊有客埋單呀，快啲執枱賺錢養女神啦。」
點解…有錢人同窮人嘅距離係會差咁遠？係咪佢哋真係咁叻所以搵到好多錢，定係好勤力所以個天奬勵佢哋？而窮人做生做死先可以有三餐溫飽…佢哋食一餐都過千蚊，一個手袋，一對鞋都成萬，咁樣有意義咩？又真係有嘅，至少同QQ食完一餐文華廳知道咗世界嘅另一邊究竟係點嘅樣。喺而家呢個世界，除咗中六合彩之外我完全唔明窮人點樣先可以令到自己變得有錢，我知道溫書成績就會有進步，但呢個世界係唔會有說明書教你點樣將自己變成有錢人，如果我有錢都唔會教人啦，傻嘅咩，嗰啲乜賺太多要分享下嘅大話真係弱智兒童先會信，就算唔係有人踢爆我都知啲垃圾KOL喺YouTube呃人錢。
不過，有錢同窮有時都可以零距離，睇QQ老竇就知，連層樓都可以被迫賣埋，而我至少有個公屋單位，無人可以搶得走。
QQ…點解妳要做落難女神嚟我身邊？如果唔係遇到妳，我大可以同細蚊和好，就算唔一齊返都可以做炮友得閒扑下嘢；而家又可以flirt下Angel姐姐，我諗佢做得啤酒妹都唔會太乖，借嚟抽下水都得掛；日日落中心玩下，躝街踢波，得閒就打傳說，肚餓就買個燒臘飯盒食已經可以好開心，而唔使不停煩點樣解決妳嘅生活問題。
傻嘅，無QQ…我又點會遇到Angel姐姐。
A：「放心啦，女神一定會鍾意你嘅。」