我:「係嘞,Angel,想問下妳食唔食煙㗎?」
唔知點解,我覺得啤酒妹同煙呢樣嘢有好大關聯。
A:「做乜呀,你想同我一齊煲煙呀?」
我:「唔係呀,我唔食㗎,雖然我唔算乖,但係我鍾意清新空氣。」講真,喺球場都唔知推咗幾多次,唔鍾意就唔鍾意,都唔明啲哥哥做乜咁鍾意㨃枝煙埋嚟畀我;好彩嘅係Carmen姐姐唔食煙,如果唔係我一定會受唔住唆擺。
A:「原則上嚟講呢,我都從來唔食煙嘅…不過呢…之前食過草。」
我:「草?!喺屋企開燈種會俾人拉嗰啲?」
唔係呀化,上次低B Miss Tang嚟家訪就話同佢開玩笑啫;乜真係這麼遠那麼近,咁容易就喺身邊識到個食草嘅人㗎?重簡單過搵食草嘅牛…
A:「就算唔喺屋企種都會畀人拉㗎啦。」
我:「做乜搞到咁大鑊要食草呀,死得人㗎喎。」
A:「其實…草呢樣嘢,好多人對佢都有誤解,論對身體嘅傷害,其實只係同煙相差無幾,所以好多先進國家而家都可以合法使用,例如加拿大,美國,荷蘭,盧森堡,但當然有數量同年齡限制,問題係呢樣嘢…食完之後實在係太過有效。」


我:「咁因乜解救會無端端掂呢樣嘢?」
A:「同你個女神一樣囉,一切就要講返去到我中四嗰一年老竇走佬開始。」
果然老竇走佬唔係有錢人嘅專利,窮人都可以發生,其實可能喺草根階層更加常見添;中四到而家即係已經走咗三年幾,睇嚟佢真係幾慘喎,不過我都無咗媽咪…但而家唔係我哋鬥慘嘅時候,所以我都唔會提。
我:「辛苦晒妳喇,Angel。」
A:「無話辛唔辛苦嘅,有個唔顧家嘅男人喺度,有同無都無乜分別,可能唔喺度更加好。」Angel姐姐無奈咁嘆咗口氣,但睇佢眼神就已經化咗。
我:「咁佢走咗…妳哋點生活呀?」
A:「靠政府囉,單親家庭加三個小朋友都唔少錢㗎,不過上年我失手JUPAS無人收,又滿十八歲,啲社署主任上嚟左問右問睇我去向,我都知呃唔到幾耐,咪正正經經搵嘢做囉,細佬妹又開始大咯,阿媽而家都有兼職,算係咁啦。」
已有 0 人追稿