我怎可能是女神👸🏻獵人🏹（第一季更新至斷更為止）: 299

我：「枝酒咁重，我幫妳攞吖。」
A：「好呀。」然後我喺佢手上接過紙袋。
紙袋入面重有佢套藍妹制服，雖然話就話我而家經常性接觸到女性嘅衣物，但係成熟姐姐放工啱啱除出嚟熱辣辣嘅衫點都有啲吸引力嘅；不過我就唔會咁變態攞出嚟嗦喇，雖然姐姐知我係鹹濕仔可能都唔會覺得我奇怪。
我：「但係我唔飲啤酒㗎喎。」
A：「做乜呀，未夠秤唔飲喺度扮乖仔呀？」
我：「唔係呀…啤酒唔好飲咋嘛。」
A：「呵，細路仔真係細路仔。」
我：「關乜事喎，酒樓個經理都話好難飲。」
A：「咁佢係大細路囉，唔怪之得會請你幫手。」
乜嘢道理嚟㗎，唔通大人就一定要鍾意飲啤酒㗎喇咩…雖然妳係藍妹姐姐，但我都要向妳聲明，味覺呢家嘢好主觀的，鍾意就鍾意，唔鍾意就唔鍾意；除非妳喂我飲啦，咁我就即刻擘大口。




成十二點鐘九成食肆都已經關門大吉，驟眼望落去得返廿四M記，一間粉麪粥鋪，重有我哋身旁嘅一間串燒店；店入面得四張枱一早就坐爆晒，咁出面都有位嘅，但就有一大堆契弟喺度煲緊煙，加埋間鋪抽油煙機噴出嚟啲煙。
A：「不如…我哋買完去附近公園食？」
我：「妳話事啦，我無所謂嘅。」
A：「好啦，咁等姐姐請你食啦，想食乜呀？」
我：「我乜都食㗎，不過唔准妳請我，大家一齊返工做乜要妳請我喎，兩份分就得。」然後我就塞咗張拆利是得返嚟嘅五十蚊畀佢，都唔知係邊個善長人翁咁大手筆，睇怕係封錯咗原本畀親戚小朋友嘅利是畀我。
其實姐姐請我食嘢就好正常嘅，畢竟都大我三年，但我一諗到佢生活艱難就容忍唔到自己喺佢身上攞著數，雖然我現況都係好吃緊，不過純粹係自己攞嚟，無人要我養QQ嘅…但Angel實在係無得揀。
我：「嘩，妳做乜買咁多呀？」
諗住佢都係嗌五六串過下口癮，點知佢一嚟就點咗隻三十蚊嘅大雞髀，再加好多其他嘅。
A：「我唔係你呀，六點到而家都無食過嘢喇，成晚返工就睇住啲客食…」
我：「妳咁樣我嗰五十蚊唔夠找數㗎喎。」




A：「我話夠就夠啦，呢幾晚我生意好，無所謂。」
既然佢咁講到我都唔再堅持，成個新年佢應該賣咗過千枝酒，如果一枝兩蚊，又或者三蚊，或者更多…嗯，應該多過我啲利是嘅。
A：「死仔包做乜攞zero呀！？」
我：「我係飲汽水嘅小朋友。」
A：「係都唔陪我飲，頂你吖，唔請你飲汽水。」
我：「無人話要妳請。」
跟手我揞咗七蚊出嚟畀個老細，其實有啲肉痛，呢個價夠喺佳寶買枝1.25L畀QQ飲喇，計埋微信啲爛鬼優惠券嘅話；正所謂傻仔健左手課金畀騰訊，我就右手喺嗰度攞返，多撚謝晒。