我用咗大概一秒嚟諗Angel呢個問題。
QQ會唔會等緊我返屋企?唔會掛,通常夜得滯佢都自己瞓先,如果肚餓佢會自己蒸蝦餃食。
QQ聽朝就去搵男朋友扑嘢,應該會早啲瞓嘅,最好餓凹返個肚索啲先畀條仔開餐啦,唔應該食宵夜,瞓靚啲個人緊要啲;無理由佢就可以搵仔扑嘢,我唔可以結識女仔friend㗎,佢根本無權管我,除非佢變返單身先啦。
最重要,我同Angel姐姐又唔係啲乜,票面睇落我同佢大纜都扯唔埋,除非打風啦,而且都係同佢去食嘢謦下欬,絕對係同女同事嘅正常交流。
我:「好呀,妳等我收工?」
A:「唔喺度等你收工唔通喺出面吹風?快啲執嘢好過啦。」Angel姐姐望住我笑。
於是我就狗衝過去執埋嗰幾張枱,Angel姐姐都有幫手,主要係幫我收返啲冰桶,玻璃樽,鋁罐;新年呢段日子我同Angel姐姐咁好謦馬叔叔點會睇唔到吖,不過佢就係一個好冷面嘅人,唔會特別多講無謂嘢,咁喺大致上唔影響工作嘅情況下佢都唔會出聲,不過睇住個啤酒妹越嚟越遲收工,唔知佢心入面會唔會諗啲乜,我就唔會去問佢。
十一點半啲客就好通氣走晒,搭九我清晒所有嘢,馬叔叔唔知係有心定無意就叫我收工;呢個時候Angel姐姐已經換返便服企咗喺門口等我。
我:「妳今日著得咁靚嘅。」
A:「有咩?同平時差唔多咋嘛。」


吓,佢平時明明就係T恤長褲加件外套就算…今日嘅佢著咗件米色大圓領低胸衫,下面係一條黑色及膝裙,黑色高筒靴,連件外套都係長身靚啲嘅,咁樣叫差唔多?再加埋佢個妝…
唔通佢係早就諗住約我食宵夜所以著靚啲?但有乜理由喎,我只係個小弟弟嚟…又或者佢係只要唔係淨返工就會扮靚啲掛,都正常嘅…女人,好似QQ咁,完全唔明佢同班八婆去玩點解要打扮,喺學校都日日見咪又係咁。
A:「嘻嘻,睇下係乜?」
我:「藍妹囉,重有藍妹姐姐。」
A:「我哋一陣有嘢飲喇。」
我:「吓…妳幫襯返自己買藍妹嚟飲呀?」我就嚟唔知自己講緊乜。
A:「唔係呀,呢枝回尾嚟㗎。」
我:「『回尾』?即係乜,中文嚟㗎?」
A:「我都係做咗呢份工先識呢個字,通常係得啲上咗年紀嘅人先會用,例如七仔啲報紙賣唔晒就會退返去報館,咁就叫『回尾』,亦都可以叫『回紙』,幾十年前的茶餐廳嗌咗枝汽水未開,嗌咗個蛋撻未食都可以回尾唔收錢,而家就梗係唔得啦,呢枝嘢係頭先有客嗌咗飲唔晒一直喺個冰桶度,有我哋喺度sale酒好多時都會有呢個情況,一般嚟講因為係我哋sale嘅所以可以自己搦返走,如果多嘅話或者可以回畀嗰度老細自用執返十蚊八蚊,就係咁樣。」
原來返工真係有咁多學問…『回尾』,等我考下QQ識唔識呢個字先。
已有 0 人追稿