我怎可能是女神👸🏻獵人🏹（第一季更新至斷更為止）: 301

我：「咁我真係男人嚟吖嘛…有得同女人玩點都開心㗎，又唔使負責任，唔使辛苦嘅話。」
A：「好似你同嗰位大姐姐咁？」
我：「嗯…不過佢贏咗，同我玩完佢就走人，反而我到而家都成日會諗住佢，明明自己就唔諗住會同佢有乜結果，但就好想佢曾經用心鍾意過自己，不過睇嚟就無發生過。」
A：「你都幾坦白㗎喎。」
我：「對住姐姐我唔講大話，呃唔到妳哋。」
A：「咁對住女神妹妹就要講大話？」
我：「應該就唔使，佢又唔會理我做啲咩。」
A：「可能大姐姐鍾意你但懶得同你講啫。」
我：「我都唔知，唔明佢諗乜，明明大半年無見過面，上次幫我包紮完突然喺兩條女面前嘴我一啖，本身痛到想喊，變成開心到想喊，然後就走咗…」
A：「可能調戲小弟弟真係幾開心嘅…其實，趁年輕玩下幾好吖，唔使負責任，有本錢可以輸，乜都無晒重可以重頭嚟過…我而家都唔知點，想玩嘅話可能好易，但已經開始厭倦，好難喺玩嘅過程搵到快樂…要認真嘅話又唔知點開始，無從入手，可能自己認真嗰陣就會俾人玩，我唔想再受到傷害，我好驚再識男人。」




我：「我…係咪唔算係男人？」
至少我唔會係佢嘅對像，應該係。
A：「你係人畜無害要養女神嘅低B鹹濕仔，點會驚你喎。」
我：「哦…係咁就好。」
A：「其實我又唔可以怪晒人嘅，嗰啲band友…其實自己都預咗會發生乜事，雖然唔可以話係情願，但都係一種放任囉…是但咁，鬼叫自己當時好唔開心，需要發洩，想人陪，又無錢，咪乜都無所謂，當時都叫開心過吖，癲晒喪晒好舒服，可能真係越墮落越快樂…」
我：「呢啲唔會長久㗎…」
A：「啱呀，好似飲酒咁，醒返之後啲問題重喺度，然後就繼續逃避，再飲過。」
我：「何苦呢…咁妳就唔好飲咁多啦。」
A：「幾時輪到你呢個小朋友嚟教訓我喎！你個死靚仔，真係想捉埋你去㨃草。」
我：「黐線㗎咩！唔准妳再掂呢啲嘢呀！」




我本身唔係乖細路，老竇又唔多理我，成日躝街點會唔知呢啲嘢，踢波啲友…有人會揩天，有人會啪丸仔，但我就係對呢啲嘢好反感；可能就係因為係媽咪對我嘅訓示，同埋Carmen姐姐唯一同我認真講過嘅嘢，佢哋都係我最信任嘅女人嚟。
A：「㨃完同姐姐做，唔好咩？」