我怎可能是女神👸🏻獵人🏹（第一季更新至斷更為止）: 323

原來已經就嚟十一點，算，都係做功課。
我要做個乖孩子，有工返嘅上進青年，照顧被社會遺棄嘅女神，唔再做獨留在家兒童。
知易行難，每次對住作文紙我都想死，如果呢個世界只係得MC，配對，排序，填充你話幾好。
我：「Queenie可唔可以教我作文？」
佢喺我隔籬寫小說，我就順便問佢。
Q：「乜呀，見你要返工我都寫咗個大綱畀你啦，自己填埋佢有幾難呀？唔係要我捉住你隻手寫呀？」嘩！女神捉手寫字正呀，嚇到吃手手。
我：「唔係呀…我識填，只係想學下點諗個大綱，我無可能叫妳每次幫我㗎。」
Q：「吓？做乜無端端咁好學嘅？」
我：「嗯，我想做個有用嘅人，唔想乜都唔識。」
Q：「哈，係太陽出錯方向吖，定係你食錯藥呀？不過既然你問到我咯，我無理由唔教你嘅，其實作文最重要就係唔好直線思考，你喺度不停諗第一句點寫好，逐粒逐粒字嘔出嚟係唔會寫得好，一篇文章有前中後，你可以諗咗個結構同大概想表達啲乜，自己熟悉嘅就可以斟著多啲，唔熟嘅就可以輕輕帶過，好似呢篇記敘文，你可以先拆分為時地人，你想描寫邊方面多啲就堆多啲字喺果part，諗下諗下就夠字數，呢個時候通常你已經知第一句要點寫，就好似你煮嘢食攤晒啲材料喺枱，你就會知第一步要做乜…」




女神真搞笑，明明自己唔識煮嘢食，但就用嚟做比喻，夠晒諷剌。
其實呢…有少少原因係Angel姐姐令到我想勤力啲讀書，雖然佢而家情況唔算好差，有正職做而且睇佢返工個樣都幾開心，但十八歲就無書讀要全職出嚟做嘢我諗呢個都唔係佢個意願嚟；可以賴屋企，可以賴豬朋狗友，可以賴學校同先生，但其實好多嘢都係你自己嘅選擇，包括為自己嘅懶惰同墮落搵藉口。
往事已矣，Angel嘅過去改唔到，就算紋身洗得甩都抹唔走啲黑歷史；呢一刻我幫唔到Angel，而佢亦都唔需要我幫，但我好想可以見返以前嘅佢，知道佢當時一定好唔開心同絕望，我諗我可以安慰下佢同陪佢，叫佢唔好群埋嗰班band友攪三攪四，重會勸佢畀多啲心機讀書…