我怎可能是女神👸🏻獵人🏹（第一季更新至斷更為止）: 324

但如果我本身就係一個懶蟲，我又有乜資格叫佢努力喎，所以而家見到Angel姐姐咁樣，我要學識開始努力，話唔定…我將來會識到另一個好似Angel幾年前咁嘅女仔。
Angel，我應承妳，唔會喂草畀個女仔食，唔會趁佢唔開心就氹佢上床，雖然我好想…但我知道，短暫嘅刺激係唔會換到長遠嘅快樂。
有QQ教我做功課其實好幸福，話咁快就作好一篇文，我唔敢話Carmen同細蚊係豬朋狗友，但係自從QQ嚟咗之後我先學識要認真對待學業。
不過架死人車其實好勤力，重話過好多次我大懶蟲，我都唔明點解佢喺間咁嘅學校都咁有心情讀書，不過呢個世界就係乜人都有，佢本身已經夠晒奇怪。
我：「Queenie，想問下『關關難過』係點解？」
Q：「咪好似你打機咁，版版都咁難打囉。」
我：「咁平時可以點應用落中文度呀？」
Q：「吓，無人就咁用㗎喎，無頭無尾。」
我：「啊，乜唔係就咁四字詞嚟㗎咩？」
Q：「梗係唔係啦，對聯嚟㗎，『關關難過關關過，事事難成事事成』呀。」




睇嚟，Angel姐姐以後一定唔會有問題。
今年嘅新年同上年聖誕一樣，放完長假返學無欠交功課，而且呢個假我重要兼故埋返工，基本上可以歸功於煩死人嘅Queenie；都好嘅，放完假可以專心上下堂，唔使日日俾先生捉落去教員室同啲功課周旋，個人都輕鬆咗唔少。
開返學就意味住，每朝起身，總會見到女神著校服…講真呢種體驗十分難得，有幾多個小朋友可以同一個異性同學同居喎，重要夠膽喺你面前換校服，我覺得呢個topic直頭可以攞嚟寫小說；人哋最多都係睇家姐或者細妹著校服，我可以話係更上一層樓！
入到去課室，繼續同QQ一齊坐，個關係又好似飄返去佢只係一個普通同學嗰邊，放假啲開心嘢嗰嗰QQ唔通係另一個人嚟嘅？聽住佢同Yvonne喺度吹八婆水，我忽然心緒不靈，撓起雙手喺度懷疑人生。
「喂…阿爽同學…爽同學…」
我心諗，QQ平時喺屋企對住我都唔係咁講嘢嘅，群埋落啲八婆度又即刻係咁假惺惺，又會係咁扮晒蟹呃佢條仔…究竟佢係咪精神分裂㗎，會唔會有廿四個QQ喺佢嘅體內？每日都咁過其實辛唔辛苦，但睇嚟佢就好熱衷於呢啲忙碌嘅生活。