我怎可能是女神👸🏻獵人🏹（第一季更新至斷更為止）: 337

我：「喂！Carmen姐姐。」其實以前同佢一齊嗰陣都好少嗌佢姐姐，除咗佢命令我嗰陣，不過今時唔同往日，我覺得都係尊敬返佢多啲比較好。
呢排喺樓下成日撞到EX嘅，係咪好彩得滯？
C：「咦，交叉仔，乜咁啱呀，係嘞，你上次隻手好返晒未呀？」
我：「兩個月咁滯喇，重未好返就死得啦，不過就…留咗條疤咁囉。」我拉開衫袖畀佢睇。
C：「有乜所謂喎，男仔多幾條疤重型啦。」
姐姐用手指喺我條疤痕上面輕輕掃過。
我：「或者啦…但我唔需要，我怕痛㗎，Carmen姐姐妳唔舒服呀，做乜帶口罩嘅？」
C：「呢排讀書辛苦，皮膚唔係咁好，所以咪…」
我：「哦，原來係遮醜用，乜妳有咁貪靚嘅咩？」
C：「個個女仔都貪靚㗎啦，你唔知咩。」




我：「都知嘅，你嚟文具鋪買乜呀？」
C：「我想買計數機呀，部死人50FH原來計唔到微積分，要3650先得，所以想買多部嚟做後備囉，雖然DSE啲微積分題目都唔會俾你用計數機計到答案出嚟。」
我望一望玻璃櫃入面嘅Casio計數機，50FH就係我平時用開嗰部，其實部部我都唔知有乜分別，亦都唔知Carmen喺度講緊乜，反而就記得Casio係同藍妹啤酒同一間公司做代理，又諗返起Angel姐姐個啤酒妹樣，再幻想下如果Carmen做啤酒妹會點…可能唔嗌酒會黑面，再同啲客鬧架。
我：「嗯，咁咪買多部囉，如果穩陣啲嘅話。」
C：「妖，坐我隔籬位嗰個話二百蚊有找，點鬼知呢度要二百五十幾。」
我：「屋邨商場就梗係乜都貴啲㗎啦，二百蚊唔使我諗要出旺角或者深水埗啲專門店買。」
C：「我都知，但一來一回又唔見粒幾鐘同車錢。」
我：「急住用咪喺度買囉，幾十蚊唔算好多。」
C：「最弊我帶得二百蚊出嚟，差幾十蚊…提款機又鬼死咁遠，行得嚟我諗不如等出開去先買。」
Carmen姐姐都係屋邨妹嚟，屋企當然唔係有錢，所以佢都係一個好慳嘅女仔，平時亦都唔會帶好多錢喺身，基本上就係每日嘅食飯錢，如果佢嗰日唔喺屋企食晏嘅話。




反而我就一定會隨身有一二百喺身，平時買餸同日用品要用，同埋慎防喺街見到啲嘢大特價就要即刻買；而我亦都同啲師奶一樣，乜鬼Alipay，Wechat pay，PayMe都儲咗一百幾十喺入面，慎防啲乜鬼M記便利店搞埋啲合作三五蚊嘅優惠。
我：「不如我送畀妳吖！」