我怎可能是女神👸🏻獵人🏹（第一季更新至斷更為止）: 338

C：「吓，無端端你做乜要送部計數機畀我？」
我：「妳以前對我咁好，都未有機會多謝返妳。」
其實重因為我今年利是大豐收，呢少少錢我都可以負擔得到。
C：「哈哈…嗰啲嘢就無謂再提喇，不過二百幾蚊都唔係少錢喎，我點好意思收你喎。」
呢個就係屋邨妹嘅好，少少錢就可以令佢哋開心，唔似得QQ一對鞋已經幾千蚊…
我：「唔使唔好意思，我而家有兼職識搵錢喇！」
C：「係喎，差啲唔記得你已經大個仔，喺酒樓打工，唔係細路嚟喇喎。」佢煞有介事咁對我微笑。
我：「咦，點解妳知嘅？係細蚊同妳講？」
C：「係呀，唔講呢啲佢重有乜好同我講喎。」
我：「咁都係嘅，所以妳就俾我送畀妳啦。」




C：「送就唔使喇，拎張五十蚊嚟啦，多謝晒！」
然後佢就喺我銀包入面抽走咗張綠蟹，呢個動作對我哋嘅關係嚟講就無乜嘢嘅。好細個嗰陣收利是間唔中重會有青蟹，紫蟹，而紫蟹唔同膠蟹，膠蟹就一定係十蚊，紫蟹有分大細，十蚊同五十蚊都有紫色紙幣，後來就變晒膠蟹同綠蟹，今時今日收利是當然最想收到綠蟹。
於是乎Carmen姐姐就買到佢需要用嚟計微積分嘅計數機，而上面真係有捷成洋行嘅貼紙。
我：「弊家nail！我唔記得咗添…」
C：「唔記得乜呀，唔好同我講張五十蚊唔用得，貨物出門恕不退換㗎。」
我：「我唔記得咗…Queenie話要買邊款同size…」
顧住同Carmen謦欬，開心得滯洗腦咁款。
C：「買乜呀？你唔係要幫佢買Bra呀？」
唔係講笑，如果要我自己一個行入Bra鋪買Bra真係頂唔順，我寧願網購送上門算。
我：「唔係…無咁嚴重，幫佢買M巾啫。」




C：「哦，係咁咋，好閒啫。」
我：「Carmen妳趕唔趕時間？如果可以嘅話介唔介意陪我一齊去百佳買…」
C：「你條友仔唔係怕醜呀？買嗰少少嘢。」
我：「咁人哋未買過吖嘛，姐姐教下我啦。」
係嘅…嗲Carmen姐姐係我其中一個惡趣味嚟。
C：「好喇好喇，怕咗你，陪你買完先返去溫書啦，我當休息多一陣。」
我：「好嘢，多謝Carmen姐姐！」
就係咁，我哋兩個一齊入咗百佳，時光倒流三百六十五日，雖然我哋無拖住手，但心入面一樣係好開心，估唔到隔咗成年都無乜點變重可以一齊溫馨咁喺樓下行。諗返起上嚟，我哋以前明知唔會有將來，又無乜感情基礎，玩下玩下嘻嘻哈哈又一日都可以胡混咗半年，都咪話唔神奇。