我怎可能是女神👸🏻獵人🏹（第一季更新至斷更為止）: 354

我：「希望…妳覺得而家係好彩啦。」
Q：「都OK咁啦，算係食得飽有覺好瞓。」
我：「係呢…妳好返啲未，重有無咁痛？」
Q：「食完熱嘢好返啲喇，臨瞓前再食粒藥囉。」
平時呢，食完飯QQ都會攞啲嘢入去洗嘅，咁我煮嘢基本上通常都係得兩隻碗，又無乜油，所以只係幾分鐘嘅事情；不過今日QQ唔舒服，我就自己即刻攞埋啲嘢入去廚房喇，本來我都諗住浸住先拖下，就好似以前我一個人都會浸到四五隻碗先一次過洗，但怕啲女人睇唔順眼…所以都係搞掂咗佢先。
而QQ就走埋入嚟廚房陪我。
我：「係喇，妳唔係寫緊小說咩，幾時貼上網呀？」早兩日我都見佢係咁喺度打字。
Q：「嘻嘻，其實我情人節嗰日已經貼咗上去。」
我：「咁點呀，受唔受歡迎呀？」
Q：「暫時無乜流量，不過新人都係咁㗎，睇下遲啲會唔會好啲啦，我都睇多咗啲人哋嘅作品，發覺網上面睇小說嘅人好似係男仔居多，女仔寫嘢未必啱佢哋，佢哋鍾意睇嘅好多都係啲低B橋段，又直接無乜感情描寫嗰啲。」




我：「男仔唔係想直接睇扑嘢㗎咋咩？」
Q：「哎呀，咁嗰啲就係甜故嚟啦，佢哋鍾意睇嗰啲，係乜女神無端端同咗自己一齊住，A0毒撚鍾意咗女同事同學，又或者唔小心睇到心儀女仔小便，同青梅竹馬唔覺意惜咗呢啲…」
我：「哈哈，好鬼無聊，明知現實無可能發生就喺度發夢打飛機，女仔friend都無個重乜嘢青梅竹馬，真係溝過女都唔會睇呢啲小說啦…唔係喎，妳咪女神無端端同咗我一齊住…」
Q：「無呀，唔寫自己呀。」QQ抿起個嘴仔。
我：「咁又係妳話啲網友鍾意睇呢啲。」
Q：「但我同你…乜有故仔咩，好似都係咁咋喎，寫出嚟我驚悶親佢哋，同埋女神已經有男朋友我驚佢哋睇到反枱。」
我：「唔知呢…不如妳又畀我睇下，起碼等妳篇小說流量加一都好吖。」
Q：「唔好，唔制，成功咗先畀妳睇。」
講完佢就去沖涼，其實我明佢諗乜嘅，由細到大我都唔鍾意畀自己啲作文同畫人哋睇，因為自己都知道好水皮，畀人睇咪盞攞嚟笑，所以我次次都當交咗功課就算；QQ啲中文水平雖然係唔錯，但小說係另一樣嘢嚟，無感覺就唔會令人想睇落去，我本身就唔鍾意睇字，如果佢畀完我睇我又話唔好睇佢一定會好失望，始終佢對自己有要求。咦，今日天氣凍咗喎，乞嗤！
回到返學嘅生活，每日都差唔多，雖然聽日無功課交，QQ都會慣性咁捉我溫下書同做功課，我亦都臣服咗，夜晚溫完書通常都會好瞓啲嘅。